呢日到會展中心萬麗酒店（前新世界海景酒店）食飯，碰到金牌公關K大哥，話佢係金牌公關，唔係擦鞋，因為佢真係攞過公關?市場推廣大獎。與大哥K傾偈，次次學到嘢，學完嘢之後，問佢江湖上有乜動靜。
大哥K話：「最轟動整個公關行業、企業傳訊界嘅，就係電盈請企業傳訊總監，獵頭公司周圍打電話刮人，呢行稍為有頭有面嘅，都會收到電話。年薪二百萬噃，今時今日好難搵嘅嘞，所以個個都講吓，但又驚自己啃唔落！」
大哥K如果有心，一定啃得落嘅，獵頭族冇理由唔搵你啫！
大哥K笑笑口話：「當然收過call，但係𠵱家啲獵頭人，似乎經驗唔係幾好，打到電話嚟，有啲白撞性質，竟然唔知我現在做緊乜嘢職位，猛問我嘅背景，有冇搞錯呀！」
大哥K身處高位，與老闆合晒何尺，都唔知幾舒服，點都唔會搵工跳槽，獵頭族打電話畀佢，睇怕只係想釣魚，希望大哥K唔做，可以介紹啲合資格人士去做啫，呢樣係獵頭族慣常手法，不足為奇，但係連大哥K嘅背景都唔知，實屬中環笑話。
年紀大一啲，要求就多一啲，所以大哥K唔好勞氣，大編輯嘅笑話可以幫佢下火。
大編輯話曾經面試一位中文系一級榮譽畢業生，大編輯指出畢業生某點錯誤，講咗一句：「我有時吹毛求疵一啲。」畢業生話：「個疵字點寫？吹毛求疵又係點解㗎？」