鄭中基、梁漢文、許志安及港姐等一班藝人，為表示對曾是非典型肺炎重災區的淘大花園居民之支持，昨日專誠到淘大出席抗炎騷記者會，又放生彩雀祈福，而一班藝人即使路經E、F、G座時亦毫無懼色。
世衞撤銷香港的旅遊警告後，特首董建華即到金鐘購物，財政司司長梁錦松亦高調遊蘭桂坊，但卻未有高官到訪曾是非典型肺炎重災區的淘大花園，只有民政事務局常任秘書長李麗娟曾私下與淘大孤雛聚餐，令該處的居民甚不滿，指已遭政府遺棄。
不過，昨日一班歌手及無綫藝員率先發揮愛心，到淘大出席記者會，宣傳本周六（三十一日）在淘大舉行的《公益金疫境同心濟社群》籌款節目，希望引起大眾對受疫症影響人士的關注，絕對是對淘大居民的鼓勵。
創淘大近月盛況
昨日無懼非典到訪淘大花園的歌手有許志安、鄭中基、梁漢文、鄧健泓、E-Kids、黃伊汶、葉文輝、顧紀筠、梁思浩及港姐左慧琪、胡家惠、嘉碧儀、蔡潔雯和林敏俐等，而香港公益金籌募委員會聯席主席余錦基及恒隆地產有限公司執行董事吳士元都有到場。
現場所見，大批歌迷到來支持偶像，加上圍觀的市民，約有三百多人，造成淘大商場近月來最熱鬧的景況。眾歌手藝員更於曾是高危的淘大E、F、G座前下車，及後又由商場步出，經過E座到空地放生近二百隻彩雀祈福。
昨日出席活動的歌手和藝員中，只有鄭中基、梁漢文、馬小靈、楊天經、吳家樂及部份無綫工作人員，仍堅持戴上口罩到場。梁漢文說：「我唔係驚，我第一日知道要嚟淘大就即刻應承，係公司要求我戴口罩㗎！支持淘大居民係義不容辭嘅，即使要上樓探訪我都冇所謂，𠵱家淘大係最乾淨嘅。」
鄭中基戴罩防咳
至於鄭中基就說：「我唔係驚，我自己有幾聲咳，人哋見我咳重驚過我啦，我怕傳染人咋。事實上大家都應該繼續防炎，為人為己嘛，不過今次沙士之後，大家都比較着重健康。」問到是否願意到E座探訪時，鄭中基說：「我唔介意亦唔會抗拒，呢度大清洗過先乾淨呀。」
而未有戴上口罩的許志安則說：「做乜要戴口罩呀？梁漢文公司要佢戴，所以我咪唔簽佢嗰間囉！講笑啫，近期唔慣戴口罩呀，錄音條氣會唔順，不過有需要都戴，我個口罩喺車度。」
港姐胡家惠則透露說：「我舅父住淘大，𠵱家搬咗去將軍澳，我以前未嚟過，但覺得今次嚟做嘢特別有意義。」左慧琪與
收日本萬隻紙鶴
節目監製何小慧昨日說：「個場咁旺好開心呀，我哋今次要帶個訊息，係唔想淘大居民受歧視，今次時間太趕，好彩政府配合，歌手又支持，希望到時籌多啲錢幫人啦。」何小慧並透露節目當晚部份歌手會到淘大塗鴉留念，陳慧琳、黎明、曾志偉及顧紀筠則會到淘大商戶消費及探訪居民。何小慧說：「我哋重收到日本人摺嘅一萬隻紙鶴，日本嗰邊重籌到七十幾萬。」
此外，昨日眾星放生彩雀時，安仔及梁漢文等人均不慎被雀屎弄污衣服，安仔稍露不悅之色，梁漢文則笑着將污物抹去。
採訪：汪正文 攝影：甄朝健
