日女星夏日透涼清一色
伊東奧菜惠非典白衣天使

夏日炎炎，各位女士除咗着少啲之外，着得淺色啲個人都好似涼快啲。一眾日本女星近排就勁興白色，一改過往去親隆重場合都着黑色嘅傳統，齊齊做另類白衣天使。當中有啲會好似伊東美咲同奧菜惠咁做全白死硬派，另外有啲就以白色為主，襯唔同飾物，例如觀月亞里莎咁。不如就等各位讀者幫吓眼，睇吓邊個白得最有taste。

全白派--身段膚色大考驗
全身白色真係好蝦人着，本身個人唔夠白唔夠瘦都唔好試，不過如果有伊東美咲、奧菜惠、加藤愛或者瀨戶朝香咁弗嘅身段，騷吓都無妨，原則係由頭白到腳，最好連鞋都係以白色或透明為主。其中奧菜惠一身MissAshida若隱若現嘅透紗裙，同伊東嘅Coccapani吊帶裙，就被評為最飄逸誘人。

半白派--簡單配搭一樣掂
對自己身材唔係太有信心嘅女士們，當然唔好着全白自暴其短啦，不如學吓觀月亞里莎，佢呢件EmanuelUngaro白色波波裙，一樣好sexy兼有拉丁風情。再唔係大家亦可以學上戶彩、酒井法子或者田中麗奈嘅打扮，以白色為主嘅簡單配搭，都好有夏日感覺。