慕尼黑1860最終都未能爭取到下屆歐洲足協盃參賽資格，但係佢喺季中羅致邵佳一嘅首季試驗都算成功，球會主席同隊中名將希士拿都讚呢位遲嚟先上岸嘅中國國腳有前途！
阿一仔加盟慕尼黑1860半季，雖然大部份時間都以後備身份上陣，但能夠對科特布斯時自由球建功，取得今季唯一入球，表現總算合格；而球會主席韋莫沙更公開話阿一仔可以代替決定退休嘅希士拿，出任中場指揮官角色，所以夏季時唔會喺轉會市場買球員填補希士拿個位。至於希士拿重預言半年後此子可以做球隊主力㖭！
我求大俠都寄望呢位年輕中國中場下季能夠有更好發揮，話晒機會可遇不可求，好似候任亞洲中國先生李鐵咁，上季都算打咗大半季，但𠵱家連有冇機會返英超踢波都唔知，都幾悲哀㗎！
時近季尾，好似馬拉加呢啲無乜好爭嘅球隊，踢來又躁又多犯規，就隨時會同對手上演一場悶戰。好似周一凌晨佢哋對皇蘇，難為我求大俠捱眼瞓，結果就睇咗場悶戰。𠵱家英意德聯賽都收晒「咧」，嚟緊都要靠西甲「頂癮」，希望唔好再有呢啲悶波直播啦！
目前英格蘭國家隊喺西班牙輕鬆集訓，唔少球員都帶埋老婆、女朋友或仔女一齊；所謂青春無敵，球員最省鏡嘅另一半，係新星朗尼嘅十七歲女朋友歌蓮，佢着住三點式泳衣，吸引唔少豔羨目光。不過，我求大俠奉勸朗尼：你淨係踢波早熟好喇，其他嘢都係慢慢嚟好！
季中以借用形式加盟巴塞嘅拉素左翼衞蘇連，最近頻頻話願意下屆繼續留效，好似好忠心咁，點知佢前幾日一個屈尾十，走去夜總會玩，結果玩到癲整親㖭，禮拜日對維爾瓦冇出場，教練安迪話一定會追究。我求大俠就話，好彩巴塞贏波啫，如果輸咗蘇連你就真係係咁先！
世界球壇有唔少「踢而優則教」嘅例子，不過東歐球壇就唔多見，好似赫傑、邦力克、沙維斯域咁，執教成績好差。最近重多咗個杜米迪斯古！佢之前教羅馬尼亞二十一歲以下國家隊唔掂，今季喺聯賽教波，結果教到隊波「降班」，又成失業大軍！
NBA官方網站噚日公布由球員投票選出嘅東岸決賽MVP，結果由隊中「大哥」傑特以壓倒性接近八成嘅票數當選，馬田就得票一成八，呢個結果可以話係眾望所歸。其實網隊連續兩季能夠成功躋身總決賽，傑特真係居功至偉，所以始終話球隊有一位舉足輕重嘅人物幾時都咁重要。