早陣子，亞Mark話過英國勞斯萊斯新代理，會響中環鬧市開設新陳列室，準備迎接部全新兼且豪華至極嘅Phantom高級轎車。正當言猶在耳之際，原來代理響上星期初，就經已空運咗部新Phantom抵港，兼且重響深夜靜悄悄地將部車擺咗入Showroom㖭！亞Mark當然急不及待，第一時間走咗落去中環，位處靠近一班香港高貴立法會議員，日常跟董特首議政嘅中環心臟地區睇吓啦！唔知係咪未正式開張呢？間陳列室並無任何勞斯萊斯嘅牌匾，而敞大嘅陳列室內裏，就擺放着一部背對大街嘅左軚新Phantom響度，重有位Sales哥哥坐響Counter入面㖭！雖然看似代理咁低調，但萬綠叢中就只得呢間咁突出嘅Showroom同新車響度，午飯時間亞Mark就留意到唔少中、外籍行政人員，響玻璃櫥窗外細看一番。看來今個月底，當新陳列室開張及Phantom跟香港車迷正式見面時，又會引起一陣哄動呢！