話說有個發展商，之前不斷好風騷話：「我哋幾個發展商已經諗住坐埋一齊，傾吓點樣搞串連推盤大行動，一於搞旺個樓市。」
噚日果然有五家大發展商嘅賣樓部頭領，齊集灣仔「留園雅敍」，包括新地、恒基、恒隆、電盈同長實。蘭西梗係去索吓料啦。佢哋見到我哋好愕然，不斷話係普通聯誼飯局啫。但係電盈李智康臨走前卻拋低一句「大家推盤沒意見分歧，細節遲啲公布。」咁耐人尋味嘅話。
之後電盈嗰邊又話，其實發展商之間個多月就會聚一聚，今次輪到電盈請，席上冇乜好認真講樓市嘅嘢。新地更好緊張咁出動到發言人，四圍去澄清話今次飯局唔係傾賣樓共識，只係聯誼喎。
今次羅生門事件，除咗係純飯局之外，蘭西諗重有兩種可能，一就係今次食飯嘅發展商口徑一致要保密。又或者只係某發展商自己一廂情願。
非典型肺炎令市民重新關注健康同居住環境，喺非典高峯期，新界樓吸引唔少人租或買，信和集團租務部助理總經理田兆源話，佢哋嘅屯門黃金海岸租務情況理想，個多月已經租出約九十個單位，當中有一家美資公司，一口氣租十間做宿舍。租出嘅以一千呎大單位為主，租客大多係嚟自市區。
田兆源又透露，接獲查詢嘅人數都一樣大增，海外人士嘅電郵查詢就升咗三倍。𠵱家黃金海岸嘅出租率係八成半，平均呎租係十到十三蚊。
樓市俾一場非典型肺炎搞到殘晒，地產界人士認為，就快開鑼嘅矚目大盤藍澄灣，係樓市嘅探熱針，個盤嘅銷售成績，多少都反映樓市復甦程度。
發展商和黃就落足心機宣傳個盤，無非都想個盤熱鬧啲，賣個滿堂紅。聽講，設喺中環華人行嘅示範單位，就快有得睇。
和黃為咗迎接呢個久違咗嘅睇樓人潮，打算賣樓期間實施人流管制，安排睇樓同買樓嘅市民由戲院里入，畢打街出。
代理行為員工提供培訓，多數側重前線代理，利嘉閣連管理層都冇忽略，最近開經理會議時，搵咗資深培訓導師黎泉輝講「領袖激勵溝通要訣」，讓主管學習管理下屬嘅竅門。呢個講者除咗有出書外，重為政府部門、跨國企業同中小企等公司做過講者嘉賓。
其實只要肯努力，升職唔困難。香港置業鰂魚涌康怡分行嘅廖綺媚，97年樓市高峯期過咗至加入代理行業，舊年五月就升做高級營業員，幾個月後就升為客戶經理，𠵱家重做埋營業經理，係一個好好嘅典範。
今年樓市好極有限，代理行不但要繼續節流，重要積極開源。中原測量師行董事總經理黎堅輝話，施老闆好鼓勵員工諗多啲新橋，佢哋早排已經睇準租務市場，開咗個租管部，最近又計劃喺內地開新公司，搵埋則師，專做室內、園林同項目設計。
黎堅輝話內地客追求名牌子公司，又畀得起錢，所以有咁嘅計劃，而呢個構思舊年已經有，今年先至落實。不過，佢話要睇內地非典幾時過去先至得。
蘭西
電郵地址：
