特首董建華自從出口傷人，斥民主派議員「膚淺」，又囂言「與時並進」後，輿論嘩然，識者搖頭，圈中人則猛咁喺度估係邊個教呢個老好人發爛渣。
官場中人笑說，現時好比文革，圍在老董身邊有個「四人幫」，即特首辦主任林煥光、新聞處處長蔡瑩璧、中央政策組首席顧問劉兆佳以及行政長官高級特別助理陳建平。當然，阿董文采武功同毛澤東都冇得比啦！林蔡劉陳，亦未必及姚文元、江青、張春橋、王洪文咁惡。
其實林煥光坐上特首辦主任呢個位之後，就好似「一入侯門深似海」，想低調都唔得，加上佢同蔡小姐都係政務主任，所謂紅褲仔出身，當日連阿董份講詞都係望得一眼，份貓紙應該見都未見過，唔會係佢哋嘅傑作。
而劉教授係讀書人一個，平日謙謙君子，頂多係口水花四濺，好少出口傷人。咁剩番落嚟，只有陳建平嫌疑最大，聽聞佢最得老董信任，對民主派成日鬧佢老細也覺得不公。
不過，官場耳語亦有傳「牛唔飲水點㩒得牛頭低」？老董咁硬頸，正如佳叔講可能佢老人家已經覺得忍無可忍啦，咪自己作主同議員火併囉。至於除咗表面四人幫，重有冇私家四人幫、隱形四人幫、北方四人幫，就要待有料人士告訴八方了。
傳真︰2623-9278
電郵︰