何韻詩、鄭希怡（Yumiko）、鄭中基、E-Kids同葉文輝（啤梨）等，前晚喺理工大學賽馬會綜藝館出席新城廣播劇團《終於我鍾意》結局大派對。啤梨同Yumiko喺劇中扮演羅蜜歐同茱麗葉，一齊坐韆鞦，場面好溫馨，佢哋又扮親嘴，啤梨重一個唔小心滑倒，好彩冇事。
而何韻詩同啤梨、鄭中基就有一幕喺床上做嘅戲，何韻詩話：「呢幕係我哋要求加嘅戲，睇嚟我呢生都冇機會有咁多男人同床，機會難逢，我一啲都冇尷尬，重好好玩㖭。」而何韻詩喺新片《豪情》就同陳奕迅有親熱戲，佢笑言話會搵徐濠縈嚟探班或者做替身。
後嚟主持問鄭中基心目中嘅茱麗葉係點樣，E-Kids嘅Tommy就即刻插嘴問佢係咪護士，因為佢嘅舊愛楊千嬅都做過護士，搞到鄭中基好尷尬，鄭中基話：「我不嬲都好敬仰啲護士，尤其係𠵱家。我都係同千嬅拍拖之後先知道佢做過護士，我覺得護士好偉大。」
佘詩曼下月初就會拍完無綫劇集《西關大少》，噚日佢喺將軍澳電視廣播城開工，阿佘喺呢套劇煞科後，會緊接另一套新劇，重會同郭羨妮、楊思琦合作，每次阿佘同郭羨妮合作必定會是非多籮籮，但阿佘好堅決咁話：「我哋好好朋友，絕無不和，而思琦係第一次合作，佢將會加入我哋雙妹嘜好朋友系列。」
黃凱芹（Chris）噚日重返港台開咪，一班歌迷重買埋蛋糕慶祝佢開咪順利，不過唔知阿Chris係唔係太耐冇做主持，佢居然一開口就講錯說話。當主持人周國豐叫佢介紹自己嗰首由伍樂城作曲、林夕填詞嘅新歌時，佢竟然話：「聽聞作曲嘅人係𠵱家最紅、填詞就係𠵱家最hit，但係我聽過成隻碟，就覺得呢首歌係最難聽嘅。」事後阿Chris就解釋番話因為成隻碟都做得太好，所以先會講呢番說話。
唐季禮監製嘅亞視劇集《男才女貌》下月二號晚首播，噚日亞視喺尖沙嘴舉行午宴為劇集宣傳，重搵咗姚安娜幫套劇玩塔羅牌占卜，點知唐季禮竟抽到一隻失敗嘅牌，但佢對於呢樣嘢唔係咁在意，佢話：「本身我都冇諗過失敗定成功，如果占卜話我成功我咪重擔心，唔知之後點算好。」
陳司翰（Victor）已經喺台灣發展咗一段時間，最近佢有份參演嘅愛情劇《又見橘花香》噚晚首播，前日一班演員就喺台灣紐約廣場舉行咗一個影迷簽名會，除咗Victor外，同劇嘅梁又琳同張孝全都有出席。Victor重喺簽名會上獻唱《又》劇主題曲《Girl》，令到當地歌迷係咁尖叫鼓掌，Victor充滿自信話：「唱現場不成問題，我在香港、東南亞演唱時，早就唱熟了。」
