小初起初以為呢期只係工業股借機炒作，估唔到連帶創業板股都有得炒。東大照明（8229）自從在5月中公布業績後，股價就升過唔停，似乎係有消息跟尾。
東大去年上市，除咗上市初段股價曾有異動之外，1年以來都唔見有乜郁動，呢個情況反映一件事，就係貨源可能好集中。
東大5月中公布截至2003年3月底年度業績，盈利5800萬元，較去年大升83%，隻股借勢炒上唔係奇，不過升勢又確係急咗啲，好似噚日咁，就升咗17.7%，收0.239元，但仍然未到招股價0.25元，所以經紀陳覺得，雖然東大升咗唔少，但如果重有得去，佢都唔會驚奇。
另外，時富投資（1049）在上周先舊後新配股，配售價每股0.275元，最多配售6000萬股，集資金額最多1617萬元。時富近年蝕錢以億計，千零萬銀真係唔知有乜用，但批貨若落在炒家手上，可能唔同講法。時富噚日大升25%，收0.40元。
慕容小初