早前，香港代理引入全新第8代富士ImprezaWRX車系，教車迷刮目相看有高評價後，為咗滿足唔同車迷嘅口味，最近代理重引進咗一批原廠STi改裝配件，經全身DressUp後嘅ImprezaWRX及STi特別版，看來均見辣味十足兼充滿狂野一面。若然想粉飾吓部Impreza座駕，兼且想與眾不同的話，就真係要睇吓有無啱心水嘅裝置選擇喇！
記者、攝影：陳偉林 車輛提供：意美汽車（23968380）
查實，呢一代全新富士Impreza，不論標準版嘅WRX或頂級STi型號，均較過往要來得有睇頭同成熟得多，難得標準裝備更較前有大躍進，因而不乏Fans捧場，車頭冚上特大嘅TurboIntake生氣入口，匹配上扁長鬼面罩同奪目有神嘅頭燈組合，經已教不少車迷留有深刻印象。然而，原廠STi嘅Racing前後包圍、獨特嘅鬼面罩新組合，重有碳纖維尾翼，又或者DTM式高置尾翼設計，重有大口徑120mmSTi尾鋼喉，以及四輪18吋Rays合金胎軨組合，就更教一班車迷歡喜若狂呢！
兩款Impreza型號車廂鋪排各異，既有舒適嘅要求，又有STi所要求嘅高性能強悍跑車一面。但若然你嫌唔夠突出的話，就不妨考慮吓STi專用磨砂合金波棍的，重有齊水溫、油溫同油壓三合一嘅中控台頂置一體式表板，還有電鍍STi防滑合金腳踏；若然係想強化引擎表現的話，重有STi製嘅電子TurboTimer同引擎室粗壯嘅塔頂Bar㗎！有齊咁多配套，又真係好吸引噃！
兩款Impreza當中，標準WRX版一台2.0公升Turbo偈有250匹輸出，配合埋5前速半自動波，可謂動靜皆宜，而頂級STi版配備一台有280匹馬力輸出嘅2.0公升Turbo偈，以及6前速CloseRatio手動波箱，起跑加速強而有勁外，重有可調校比率嘅中央差速器及引擎灑水裝置，駕駛起來自然倍感愜意呢！
富士ImprezaWRX有另類包裝