喺黃埔花園有一間專做川、滬菜嘅飯店，這裏的食品好食到連日本遊客幫襯都未算出奇，最特別的地方是老闆在同區兼營中醫館，光顧食店的客人，不時有特製補身湯水，而到中醫館看完病的，就可以享用食店的免費小吃。
記者：何善華
攝影：陳偉強
呢間黃埔區的川滬飯店，老闆唐玉燕話自己比較低調，不想放太多資金在廣告宣傳上，她明白好的東西自然有吸引力，所以寧願放多些時間在研製食物的質素上，令食客光臨時有賓至如歸的感覺，果然明白「有麝自然香」的道理。
在上海出生嘅唐老闆表示，自小已經懂得烹煮幾味上海菜，對上海美食情有獨鍾；1986年來港後，矢志有機會便會開一間專做上海菜的飯店，經過多年奮鬥，終於5年前達成心願，開設了這間「虹橋飯店」。
飯店的主要客源，除本區居民外，更有不少上海和日本的遊客專誠慕名而來。「能吸引到日本遊客，我想是有些運氣的。一次，有位日本記者到香港旅行，偶然的機會來這裏幫襯，發覺呢度嘅食品好味又吸引，於是返到日本後，便在雜誌上介紹我哋飯店，就係咁多了一批日本遊客的生意。」唐老闆說。
唐老闆除了懂得自製上海小食外，她更精通推拿按摩嘅技巧。為了同一時間可以打理醫館和飯店嘅生意，她特別在飯店對面的商場內經營一間全科中醫醫館，病人在醫館診症後，更可到飯店免費品嘗小籠包和豆漿。
「開飯店是為了實踐自己嘅心願，但都好驚生意難做；於是諗如果開多間醫館的話，大可用醫館賺到的盈餘，補貼飯店嘅成本，但現在卻不需要互相補貼了，因為飯店和醫館的生意都頗理想，每個月都有錢賺。」唐老闆話有不少食客都知她同時經營中醫館，平日都會順便自創幾款藥材靚湯供顧客飲用，最近亦因「沙士」肆虐，而特別炮製了幾味抗炎涼茶，好幫顧客「整理個肺」。
飯店更特別僱用了正宗上海師傅打理廚房，務求能「同聲同氣」將菜餚烹煮得更好。不能不提的是，飯店嘅招牌菜，係老闆親自研製的「上海砂鍋菜飯」。唐玉燕深明上海菜多油肥膩，未必適合廣東人，於是花了好幾個月，炮製出這一道改良的砂鍋菜飯，推出後果真大受歡迎，更有不少食店爭相模仿。
上海菜式有不少是冷盤美食，呢味鎮江餚肉是以凍豬仔肉作主要材料，經3小時溫火煮至「起膠」後始出籠，品嘗時可蘸上少許紅醋，肉質鮮味更能盡情散發。
這味菜式的調製過程頗繁複，首先要用豬油將鹹肉粒和火腿粒炒熟，再將已煮好的白飯，混和雜菜撈在電飯煲一起煮，入口飯粒甘香而菜汁鮮甜，不愧是鎮店之寶。
老闆話以前調景嶺未拆前都有得賣，但𠵱家就只此一家可以食到。用傳統焗爐炭燒而成的上海大餅，主要以麫頭發酵而成，配以麥芽糖、芝麻和香葱，咬落香脆唔油膩。
用正宗蓮子和最靚的金華火腿而製成的「蜜汁火腿」，火腿色澤新鮮得像三文魚刺身，配以飯店秘製的蜜汁，吃起來爽甜多汁。
材料包括有豬肉粒、花生、蝦米和榨菜，再配以正宗上海辣味湯底的担担麫，入口即覺「舌頭」大動，感官神經即時活躍起來。
上海虹橋飯店
地址：紅磡黃埔花園第一期地下一號舖
電話：23630032
營業時間：上午11時至晚上11時