日本富士車廠繼推出新一代Impreza車系，而備受車迷追捧後，廠方又於日前推出新一代Legacy車系，新車除有走旅行車路線嘅TouringWagon型號外，向來為車迷所受落嘅四門版B4型號亦以新面目示人，而且其吸引性亦較TouringWagon型號為高呢！
新一代LegacyB4擁有一個予人耳目一新嘅造型設計，不但用上與新款Impreza車系相近嘅頭燈設計，響全新泵把連氣霸及鬼面罩組合襯托下，一派高性能房跑車形象可謂表露無遺；就連車尾線條亦經過改良，頭燈配搭更較前來得清晰易讀呢！車廂布局方面，不但空間較前來得闊落，當中前排一雙仿桶形前座更能夠畀到你有十足承托力，乘坐舒適度十足；而經過重新設計嘅中控台，亦有齊各項配備，如原廠冷氣及高級音響等等，使用時可謂十分方便。另外，三幅式跑車軚環及全新表板配搭，望落都好有跑車Feel㗎！
然而，廠方就為新車配用一台編號EJ20嘅2.0公升水平對向四汽缸引擎，馬力輸出由140匹至280匹，並附以5前速手波、4前速自動波及5前速自動波，從而令性能表現發揮得淋漓盡致。未知香港代理方面，何時會將之引入呢？