九龍倉旗下三個商場，尖沙嘴海港城、銅鑼灣時代廣場同鑽石山荷里活廣場，舉行一人一歡笑慈善行動，三個禮拜籌得超過三十萬，昨日請來演藝界嘅陳慧琳同公益金董事王冬勝，代表香港公益金接受善款。呢段期間，商場人流重回升兩至三成，既做慈事又助消費，一舉兩得。
九龍倉執行董事李玉芳話，啱啱過去嘅周末，海港城錄得十六萬人次，較平時約十二萬上升三成三。時代廣場則有十二萬，多兩成。至於荷里活廣場四點六萬人次，也高兩成一。
本港已撤銷旅遊警告，李玉芳預期，成效會喺六、七月見到，估計集團旗下各商場人流，有機會增加至十七、八萬。佢又透露，九龍倉因為肺炎請多咗一百名員工，至於舉行宣傳活動、清潔商場、添置防炎物品等，已花費超過千萬，現時實行嘅防炎措施仍會持續。
大角嘴港灣豪庭最近推出一口價促銷，反應唔錯，發展商恒基添食再嚟多次。由於第一期已入伙，都係時候搞啲新意思，除繼續請歌星獻唱、免費飲飲食食外，重整咗個大型波波池，畀小朋友玩，等大人可以放心去睇示範單位，賣出嘅機會都大啲啦。由於樓盤減咗價，所以銷情好咗，單位售價由一百二十零萬起，吸引好多置貸客入市，比例重唔細㖭。
太古搞宣傳喜歡以概念掛帥，例如以環保做賣點嘅鰂魚涌逸樺園，今日起一連五日喺太古坊德宏大廈一樓，舉行『思想‧家』環保築跡全博覽，希望參觀者更加認識環保建築對改善居住環境嘅重要，同埋逸樺園為住戶帶來嘅嶄新綠色家居概念。
太古地產高級營業經理馬淑貞話，逸樺園無論建築方法、用料、設計以至管理模式，都符合環保同健康原則，物業設有空中花園、露台，為住戶提供更多綠色休憩空間，時刻享受舒適閒逸氣氛，總之就係正！
九倉助理董事黃光耀大病初愈，就急不及待頻頻曝光催谷新盤，長實執行董事趙國雄都讚佢好嘢，重好熱情咁話，叫記者代勞，送長江生命科技嘅防疫新產品VitaGain畀黃先生試飲，認真有心。
另外，長實嘅豪宅盤畢架山一號向來都有唔少外籍買家垂青，繼早前有科威特人入市後，長實高級營業經理郭子威話，日前又有一名住喺尖沙嘴嘅巴基斯坦籍買家入市，以千多萬元購入一個十七座千九多方呎的單位。
大部份北上消費嘅港人都讚內地服務態度好，食餐飯都有十個八個人招呼，參觀樓盤又有專人帶領。蘭西自從採訪過深圳福田某個貴價新盤，感受更深一層，該盤上上下下嘅員工不知幾盡責，有好幾位掃地阿嬸，見到蘭西喺示範單位影相，立即斥喝不准拍照！好彩蘭西攞正牌係代理邀請嘅，唔係實俾佢用掃把趕。
蘭西
電郵地址：
