響陳列室一角，擺放有一部不經意嘅CooperS型號，細看之下，原來係香港代理新近引入英國JohnCooperWorks嘅引擎改裝套件，可將原來輸出163匹嘅CooperS，馬力躍升至200匹咁多㗎！據知，加咗呢套改裝件後，0至100公里加速度不過6.7秒，極速更高達226km/h。全套改裝件售價4萬5千元（未連稅），加埋CooperS嘅車價連同首次登記稅項，總值30萬之內，惟經由代理改裝，車主可享有一切原廠保養。
JohnCooperWorks總部位處英國EastPreston,WestSussex，自從JohnCooper於2000年12月病逝後，現今JohnCooperWorks係由其子Mike負責。
要數到Mini最為車迷津津樂道，會係1964年至1967年間，JohnCooper曾以一款MiniCooper參加蒙地卡羅越野賽，並連續四年奪魁呢！
（部份圖片由寶馬汽車提供）
喺網上，其實都有好多關於Mini嘅網站供大家瀏覽，除有由廠方及各代理設立嘅官方網站外，另外重有車迷會、歷史資料等等，保證令你目不暇給；而本欄為大家介紹嘅Mini網站，可稱得上係最熱門嘅其中三個，係MiniFans嘅你就記得去睇睇喇！
有車壇長青樹之稱嘅MiniCooper，除成為車迷多年來嘅追捧對象外，而且重響多套電影或MusicVideo中擔任「主角」㖭！當中最為大家熟悉嘅一定會係《戇豆先生》。
不過，如果大家想一睹新MiniCooper響電影中嘅英姿的話，就一定要留意於本月喺美國，同埋九月響英國上映嘅《TheItalianJob》喇！喺戲入面，三位主角分別會駕駛MiniCooperS及MiniCooper偷運金磚，並與敵人展開追逐，除攀山涉水外，而且重會「跑樓梯」，完全將Mini靈活輕巧嘅一面表露無遺。有興趣嘅車迷，記住要留意《TheItalianJob》喺香港嘅上映日期喇！
（圖片由寶馬汽車提供）
新一代MiniCooper，除備受車迷追捧外，本港不少歌影視明星亦被佢嘅風姿所迷倒，當中包括有陳文媛、徐濠縈、田蕊妮及吳彥祖等等。
而喺2002年11月於西班牙巴塞隆拿舉行嘅「MissionMini」比賽中，新一代型男吳彥祖更擔任隊長，與其他三名隊員代表香港出戰，經過多日來不停比賽，以及穿梭於當地嘅橫街窄巷後，最終響十七個參賽國家，共八十名參賽者中獲得第三名，成績可謂非常出色。
新款Mini由推出至今短短約兩年時間，經已售出超過200,000部新車，當中頂級CooperS更成為車迷一致推崇嘅型號㖭！然而，早前有不少外國傳媒報道，謂廠方正落力研製全新MiniConvertible開篷車，並預計於2004年至2005年間推出市場，但消息一直未被有關方面證實；不過各位MiniFans唔使感到失望，因為廠方管理層於早前一個會議上，已決定推出全新MiniConvertible，但未有公布有關此車更多資料及確實推出日期。一般相信新車各項配搭會與現有硬頂型號相近，另外又有傳新車外形，會有如右旁嘅預想圖一樣來得甚具跑味。有興趣嘅車迷，就要留意廠方日後嘅公布喇！