新澤西網隊噚日以直落四場橫掃活塞出局，連續第二年殺入NBA總決賽。咁啱得咁蹺，同市嘅職業冰棍球（NHL）新澤西魔鬼，又殺入總決賽，可謂雙喜臨門。點知當網隊贏波後被問到對喺同一場館比賽嘅魔鬼點睇，網隊班球員個個口啞啞、𢱑晒頭！
原來班網隊球員好多從未睇過NHL嘅比賽，搞到連「住喺隔籬」嘅魔鬼隊球員一個都唔識，認真羞家！呢件事令我求大俠諗起，喺美國街頭有句口頭禪：「白人不會跳，黑人不會滑冰」（whitemencan'tjump,blackmencan'tskate）。即喺話白人打籃球唔掂，黑人打冰棍球唔得，所以NBA係黑人球員嘅天下，而NHL就係白人球員威晒。
不過今次新澤西嘅球隊總算可以威番次，打低晒隔籬嘅紐約市財雄勢大嘅球會，一吐屈咗十幾年嘅怨氣！
基爾禾前日作客輸畀祖雲達斯，連足協盃參賽權都無埋，整季努力化為烏有。我求大俠有睇公仔箱延播，只怪歷高達利同埋文沙都響補時近門失機。踢完場波退休嘅比亞荷夫就連中三元真神勇，第日同子孫講省得入祖記三球，總算係一件光榮事。一代「空中霸王」，好波！
唔少歐洲名將都興去西亞搵食，最近有好幾間阿拉伯球會向阿仙奴嘅前鋒簡奴招手，據講「兵工廠」為咗唔阻人發達，都願意免費畀簡奴走，不過簡奴就唔肯，話要留隊證明自己。我求大俠好佩服簡奴嘅志氣，不過既然唔受阿仙奴重用，去其他球隊尋求發展重好！
英格蘭早前同南非友賽後真係新聞多多，先有隊長碧咸整親手，𠵱家又傳英格蘭足總見錢開眼，收咗南非足總一百萬鎊（約一千二百萬港元），確保碧咸上陣。雖然英國傳媒不斷咁炮轟英足總，不過國家隊踢表演賽收戲金，其實好平常，巴西國家隊都做唔少，唔使反應咁大啩？
德甲聯同法甲聯都喺前日煞科，多蒙特同埋馬賽嘅命運就最相似，原本兩隊喺煞科戰前都排第二，下屆可直接踢歐冠盃，點知喺煞科日同失分，齊齊跌落第三位，要踢歐冠盃外圍賽。不過，正如多蒙特教練森馬所講，佢哋係衰自己，冇得怨。
騎士贏咗今年嘅第一選秀權後，全城市民歡喜若狂，但係最冇癮嘅竟然係勒邦占士本人。原來喺短短一日內，幾乎所有靚嘅騎士季票座位都被搶購一空，搞到連我哋呢位未來狀元爺打電話想幫朋友訂幾張套票，都被拒諸門外。其實以佢嘅身價，只要向騎士班主開一句聲，莫講話幾張套票，就算幾個包廂都照畀啦！