世衞撤銷旅港警告，上周六講過邊啲相關股份得益。恒指上周收9303，若然個市因為世衞消息彈高一二百點，挨近九千五嗰頭，則不宜衝動，最好稍為忍耐一吓，等回吐多少先至揀Call輪買。至於Put輪，暫時咪諗住。
有啲基金股，長升長有，當然唔係直升，而係唞吓再升，升完唞吓。等唞吓之時，買佢哋啲Call輪。思捷Call輪9613，11月到期，現價30仙，溢價4.2%，槓桿率5.4倍。華能Call輪9401，9月到期，現價22.7仙，溢價冇晒，槓桿率3.6倍。中電信Call輪9696，11月到期，現價23.5仙，溢價3.4%，槓桿率7倍。呢3件爆炸力唔算特強之Call輪，吼住平番啲買貨。
公司輪方面，有隻數據好正，就係亞鋁輪314，明年4月到期，現價12仙，槓桿率7.3倍唔細，溢價1.1%吸引，缺點係交投唔多。望番轉頭，月初至今升幅近倍，要有勇氣甘冒難買難賣風險先至敢買。
中旅（308）因為撤銷旅港（及廣東）警告而得益，股價料會搶上，但隻末日公司輪763是否搶得過要兩睇。現價2.8仙，溢價10.4%，槓桿率40.4倍。行使價1.22元，計埋輪價，總成本1.25元，而去到尾通常要有折讓隻輪先至有人買，即係正股下月唔見1.30元，炒隻輪會燒到手指。
章盛