SCE喺今年羅省舉辦嘅E3EXPO，以《GT4》豔壓全場，車夠真景夠靚，引嚟無數人士排隊爭試玩。有GT之父稱號嘅山內一典更到場為傳媒介紹《GT4》之特色，我哋當然唔放過訪問山內先生嘅機會，睇吓上年承諾嘅香港賽道有乜新進展。
直擊記者：徐影龍
記：目前《GT4》達到幾多開發度？
山：大約70至80%之間，極希望能趕及在今年聖誕檔期推出。
記：會推出剛公布之PSP手提版《GT》嗎？
山：由於PSP之3D表現非常優異，故十分有興趣推出PSP版《GT》及《GT2》。
記：上年山內先生到港時，曾承諾之香港賽道情況如何？
山：現時嚟講，我們仍希望可將香港賽道收錄在《GT4》內，不過實際情況仍屬未知之數。
記：是否親身視察所有新加之賽道？
山：為找尋最適合嘅賽道，所有賽道我都會實地視察，包括紐約及遙遠嘅大峽谷等，以求做出接近真實嘅賽車感覺。
記：現實生活中喜歡飄移嗎？
山：十分喜歡，現實生活中駕車時偶有飄移，應用喺《GT4》內亦非常真實，不過只能答句並非每天都在飄移。
筆者無責任推測
從《GT4》之完成度嚟睇，新加賽道大抵已塵埃落定，為顧及年尾之聖誕黃金檔期，難以再花時間拉隊來港視察賽道，加上「沙士」威嚇猶在，《GT4》收錄香港賽道機會可謂渺茫，期望往後《GT4》追加版本有所改變。較令人期待係PSP上推出《GT》系列，以山內先生之嚴格要求，相信可突破手提機之極限，做出高水準之賽車遊戲。