八方噚日喺一個場合度見到政制事務局局長林瑞麟，個場合講非典型肺炎對兒童嘅心理影響，記得林局長有兩個囡囡，所以問佢自己嘅睇法，點知講講吓竟然講到香港制水。
話說局長個細女喺半山某校讀中一，過去嘅個零月都停課，不過局長話佢好乖，充份利用時間溫書同睇課外書，絕對冇荒廢到學業，心情亦都好穩定，冇任何心理問題，唔似有啲親戚朋友嘅仔女，唔返學就悶。
局長好感觸咁話，停課對個細女嚟講係一啲人生嘅經驗，好似六十年代香港四日供水一次咁，佢重記得當時唔使着校服返學，避免阿媽要日日洗啲白恤衫。
至於二十二歲喺英國讀緊最後一年大學嘅大女，就因為要考畢業試冇得返港過復活節，而局長亦因為非典，有工作在身唔可以飛去英國探佢，惟有寄望八月佢畢業時，有時間參加畢業禮。
局長重話，非典期間一家人從來都冇停止過消費，每個星期六、日都會出去行街食飯，重幫個女買禮物送畀同學仔㖭！
傳真︰2623-9278
電郵︰