上個周末，相信好多香港市民同亞Mark嘅心情都一樣，除有如釋重負之感外，兩個多月以來終於可以開懷一笑，皆因世界衞生組織撤銷咗對香港嘅旅遊警告，可謂不枉三名盡心盡責嘅醫護人員，為保護香港人而捐軀嗰份高尚情操。再者，亞Mark亦好開心見到香港汽車商會，一班會員能夠摒除私利，踏出嚟為香港、為同業做點實事；響當日悶熱嘅氣溫下，26間汽車商會會員，齊集多部新車響中環添馬艦舊址，舉行「一路同心」為香港嘅汽車巡遊宣傳活動，希望財爺能夠從中認真考慮一吓，涉及數萬名汽車業界人士嘅生計，能夠盡早調整汽車首次登記稅嘅方案啦！
另一方面，家陣部份車行除推出買車有優惠外，就好似寶馬咁，雖然無買車折扣優惠，但佢哋亦無依從新調整稅制加車價噃！剛啱亞Mark就聞得代理再度加推咗30部寶馬318iA四門轎車，仍照原來優惠價28萬8千出售；若然想促進吓香港市道，或有意買車、換車的話，就不妨諗吓喇！但記住數量有限，賣完就無㗎喇！