董特首民望愈來愈低，八方近排聽親有關佢嘅事，都唔慌好，噚日罕有咁聽到一宗好人好事，要同大家分享吓。
事緣噚日下午五點半，董特首同幫辦保鑣一齊喺山頂寶雲道跑步，輕鬆輕鬆，點知跑跑吓天公不造美，突然落大雨，冇法子啦，惟有搵個避雨亭避避。
突然，一位外籍男士氣喘喘跑過嚟，同老董講話前面冇幾遠有位女士暈咗！
老董聽到後即刻叫幫辦保鑣跑去睇吓，發現有一位四十幾歲嘅澳洲籍女士臉色蒼白，呼吸困難。好彩幫辦保鑣識急救，佢重一邊安慰呢位女士，之後就馬上報警。
老董隨後淋到濕晒咁趕到，佢聞說位女士唔肯去醫院，於是落足嘴頭，重打埋電話畀位女士嘅老公一齊勸佢入院，卒之勸服佢入番平時睇開嘅港安醫院。
幫人幫到底，老董於是出動埋自己架七人車，叫司機車晒所有人，包括病者、發現女士嘅外籍男士、保鑣等去醫院。落車嘅時候，老董重親自扶位女士去門診部㖭！直至人家嘅丈夫嚟到，老董先走。到夜晚幫辦保鑣打過電話畀女士嘅丈夫，知道佢太太只係缺水，冇乜大礙，已經出院。
傳真︰2623-9278
電郵︰