講同等咗年幾兩年嘅3G，終於都見到……塊板，早幾日羅新基去中環華人行就見到和記嘅3G專門店「3」架起大大塊裝修圍板，進行緊店舖裝修工程，睇嚟3G正式走入民間嘅日子已經唔遠。而羅新基就問過和記有關人員幾時先有得玩，答案就當然係叫羅新基繼續等吓先，唔使咁心急，想玩3G嘅朋友亦都不妨耐心等吓啦。
文：羅新基
部番梘仔手機西門子SL55，終於都正式派貨落場，重搵埋當紅嘅陳奕迅同容祖兒拍廣告Sell新機，而新機行貨開價就要$3,380，不過唔知係咪明星效應加埋外形夠Cutie，又有六萬五色彩芒、GPRS、及WAP，價錢就即刻坐火箭咁升，星期六到場即時炒到$4,280，據手機舖老闆話重要賣到斷貨㖭，估唔到SARS一走馬上連手機市場都生猛番晒。
羅新基早幾日睇報紙話日本Konami整咗部用手機紅外線玩嘅遙控車，不過其實香港都有得用手機嚟玩遙控車，呢部由數碼通出嘅遙控車，插上發射器就可以用手機嚟遙控部車，羅新基玩過的確相當得意，不過操控性就真係要花時間熟習，數碼通遙控車適用於大部份Nokia手機，遠至8210、新至7250都玩得到。而價錢就係數碼通用戶賣$98，唔係數碼通用戶就每架賣$198。