電影《六樓后座》嘅一班演員，包括麥浚龍（Juno）、蕭正楠、林嘉欣、蘇永康同鄧健泓等，噚日一齊去到馬鞍山出席宣傳活動，早排有傳蕭正楠俾死對頭Juno搶咗電影插曲嚟唱，結果深生不忿唔做宣傳，今次都可算係傳聞後佢兩個第一次同台演出。
不過Juno噚日表現得好避忌，馮仁昭收到風，話Juno經理人公司事前同電影公司講，唔想同蕭正楠一齊出席呢個活動，結果噚日Juno打頭陣唱完之後即刻鬆人，同蕭正楠始終無緣見面。事後Juno話：「就算見面都唔會尷尬，大家男人唔會為咗小事去嬲嘅。」而蕭正楠就話：「喺《1:99音樂會》後台都見過面，但我哋各自唔得閒所以冇打招呼。有冇得唱歌唔緊要，有得拍戲已經OK。」
另外，林嘉欣喺台上玩遊戲孭起周永恒，點知唔夠三秒就失手，將對方撻落地，鄧健泓重即時扮同佢急救。提起上次《勁歌金曲》錄影嘉欣問Juno有冇臭狐，嘉欣話：「佢唔認有，佢唔係男人嚟嘅咩？有呢啲味好正常啫！」
林子祥（阿Lam）同老婆葉蒨文，前晚喺新加坡舉行演唱會，吸引咗約六千名觀眾嚟捧場，觀眾似乎唔怕非典型肺炎。謝霆鋒媽咪狄波拉咁啱又喺新加坡，所以佢都特登嚟到捧場，而阿Lam重唱咗好多首本名曲，好似《真的漢子》同《分分鐘需要你》等。
古仔噚日終於喺塞班島返咗嚟啦！上個禮拜佢喺塞班影唱片封面同寫真，原本大前日返嚟，點知因火山爆發同打風，結果要先去日本再轉機，噚日下晝兩點先返到香港，佢一落機就好關心問同行喺菲律賓轉機嘅記者返嚟未，古仔話：「𠵱家返屋企放低行李，我又要趕住去開工拍《戀上你的床》，又要開工啦。」
蘇有朋前晚喺台灣揸車同朋友去街，當佢將部車停喺台北東區一間鐘表行附近時，咁啱發現表行俾人打劫，佢於是即刻報警，事後經理人宋文善要求警方派員保護蘇有朋安全，宋文善話蘇有朋喺案發現場附近見到一灘血，初時重以為拍戲，後尾聽到有人叫救命，先知真係打劫！事件曝光後，宋文善擔心啲賊匪會對蘇有朋不利。
吳君如噚日喺奧海城現身，支持528「世界婦女健康日」宣傳活動，今次嘅主題係教大家紓緩壓力嘅好方法，君如重同一班女士喺台上即場示範如何開懷大笑㖭。原來閒時君如好鍾意以笑嚟減壓，佢認為一個人笑得多就自然會帶畀自己歡樂，君如重呼籲未有拖拍嘅女人快啲搵拖拍喎。
