呢輪天氣愈嚟愈熱，大使出外工作不時大汗叠細汗，之前，大使去探訪七十四歲獨居嘅鍾婆婆，佢話屋企把電風扇係六二年買，到𠵱家重開得着，不過就算開到最大都係冇風，把風扇又唔識得轉頭，佢叫大使埋位涼吓﹗但係過咗幾分鐘，大使身上嘅汗依然係咁流……
鍾婆婆同大使講，呢輪把風扇成日發出「達、達」聲，除咗搞到夜晚冇覺好瞓之外，最擔心都係驚把風扇隨時會漏電，所以每瞓一陣就會醒一醒。佢話自從老公死咗之後，電器壞咗冇人整，自己食綜援都要好慳，根本冇多餘錢去買電器，所以就算把風扇壞壞哋，佢都唔捨得丟咗佢，繼續用落去。
大使將鍾婆婆嘅需要刊登喺報紙之後，蘋果基金各位手足先後收到二十多個熱心讀者嘅電話，大部份都係話買新電風扇畀婆婆。
見到讀者嘅踴躍反應，大使都唔怠慢，即刻同善長聯絡，等婆婆盡快有把新嘅風扇用，夜晚可以有覺好瞓。
𠵱家經濟咁差，市民又要面對「沙士」帶嚟嘅多方面衝擊，但係大家仍然咁落力為貧困長者獻出一份關懷同埋愛心，大使都肅然起敬，希望各位善心人士早日遠離呢場「沙士」風暴，個個身體健康、日日笑口常開！
暖流熱線
電話：29908688
傳真：23702192
電郵：
網址：