曾風魔萬千車迷嘅英國MiniCooper（迷你谷巴）小車，自納入德國寶馬集團後，廠方便銳意研製全新型號，而新車已於2001年下半年，陸續響世界各地跟車迷見面㖭！相比下，有東方之珠美譽嘅香港，雖然面積不大，但追捧Mini嘅車迷卻為數不少，目下嘅新車銷量累積幾近千部呢！有見及此，香港代理早前決定斥資喺土瓜灣開設專門嘅MiniCentre，內裏既有大規模嘅陳列室，重有給車迷消閒休息嘅Corner、Mini精品廊、汽車服務Counter、尊貴嘅汽車接待處，當然唔少得重有大型嘅Mini維修中心啦！若然你有興趣先睹為快的話，不如就跟我哋嘅靚女ImageGirlDebbie，一齊嚟睇吓啦！
記者：陳偉林、鄭達基
攝影：陳智良
ImageGirl：Debbie
場地提供：MiniHongKong（27123262）
咪以為MiniCooper不過係一眾城市小車嘅一員；查實自上一代誕生以來，就有唔少車迷替其裝身打扮一番，既有傳統英式小車風采，又有好啱戶外用嘅迷你RV粉飾，當然唔少得重有小跑車嘅辛辣一面呢！
位處地下嘅Mini陳列室，面積之大喺香港可謂數一數二，既擺放有多款不同型號嘅MiniCooper，任由車迷參觀細看，又有接待處同車迷用以歇息嘅地方，整個設計意念源於德國慕尼黑嘅MiniCooper總部，內裏重營造有全新Mini嘅活潑氣氛㗎！
一般汽車入廠維修，都不過由負責嘅接待員一手包辦，但最令Debbie驚訝嘅地方，會係Mini有專設嘅汽車接待處，及後重有慇勤有禮嘅接待員，向你查詢部車嘅狀況同其他細節㖭！有咁好嘅Service，又豈止一般車主可以享有呢！