江華祖籍潮州，家中長輩的思想十分傳統，其父教導子女時會施以體罰。江華十歲那年，試過貪玩至深夜才回家，結果給父親罰沒晚飯吃外，還被吊起來棒打一番。
江華原名陳木華，生長在一個小康之家，祖籍潮州，家中長輩的思想十分傳統，並有點重男輕女。
江華是家中孻仔，上有一兄一姊。俗語有云孻仔拉心肝，那江華豈非自小得到雙親的寵愛？江華日前說：「我覺得阿爸最錫係大哥，我同家姐都一般。」
江華表示小時候很頑皮，不過父親很嚴，當子女做錯事時，便會施以家法──藤條炆豬肉。江華說：「我記憶最深嘅一次，係我十歲嗰年，我貪玩同朋友去咗赤柱釣魚，因為玩到忘形，搞到好夜先走，回程時攰到喺巴士瞓着覺，到站都冇人叫我起身，當我驚醒返到屋企已經係深夜。」
當晚江華除了被罰沒晚飯吃外，還給爸爸吊起來打，江華說：「阿爸吊起嚟用棍打仔女，阿媽都唔敢求情。每次阿爸打人，佢就好似法官咁，判咗刑係冇得改，結果嗰次我成身都係傷痕。」對於父親的教誨，江華至今仍銘記於心，不過現在有一子一女的他，卻不主張對子女施以體罰。江華說：「我會當一對仔女係朋友，大家保持密切關係，佢哋有心事一定同我講，我覺得呢種親子關係先係最好嘅溝通方法，否則子女怕咗父母，乜都唔同佢哋講就好失敗。」
採訪：比華利
