中大矯形外科及創傷學講座教授梁秉中素來溫文爾雅，說話小心。最近可能受到「沙士」刺激，滿懷激憤，公開發言甚為大膽，例如五月二十三日《信報》報道，梁教授評論董建華兩個星期前提出成立類似美國疾病控制及預防中心（ＣＤＣ）的組織，梁教授話：「ＣＤＣ即是等於現在的衞生署，董建華是否要架空衞生署？如果是，為甚麼？否則，是否要擴大衞生署！」對於楊永強主持檢討沙士疫情委員會，梁教授亦語帶譏諷。
沙士未走，楊永強、衞生署與前線醫護人員嘅關係，已經好緊張，互相不滿。聽一位消息人士講，香港成立ＣＤＣ，就係特區政府完全改組或甚至廢除衞生署嘅陽謀，點止架空咁簡單。為甚麼？理由一籮籮，唔使局長去搵咯，香港大學亞太研究中心榮譽研究員WilliamMeacham已經開咗「海瑞罷官」第一炮，佢喺《南華早報》評論版（五月二十三日）發表長文，痛罵特區嘅衞生官員，屢失先機，漠視廣東疫情，全無防範沙士之心，最失敗嘅，就係：「廣華醫院與衞生署都冇問到『指標病人』（indexpatient，即來自廣州嘅劉教授）住喺邊度，要到新加坡、加拿大通知！」呢位Meacham先生指出，由去年十一月中至三月初，廣東省已全面爆發沙士，香港官員仍然發緊夢。清算衞生署已吹響號角，梁教授問董建華想點，答案幾明顯。