韓劇《愛上女主播》嘅女主角蔡琳，前日終於披上嫁衣，同歌手李承煥結婚，聽講嗰日有唔少圈中好友到場贈興，連呢排因為公開同李秉憲之戀而成為風頭躉嘅宋慧喬亦有到賀。
不過我大口羅拉揸住張大合照搵咗好耐，先至搵到邊個係佢，因為平日好lady嘅喬妹居然着住牛記笠記出現，成個師奶咁。
至於新娘子蔡琳前日就梗係扮到天仙咁靚啦，佢同官仔骨骨嘅老公李承煥喺新羅酒店舉行盛大婚禮，李承煥重即場唱情歌冧老婆，十足開騷一樣。
睇啲韓國報章嘅報道話，嗰日有成二千幾人走去恭賀呢對新人，認真熱鬧，單係圈中嘅明星好友，已經有成百幾人咁多，都可以話係星光熠熠。不過我羅拉睇勻啲星，發現我哋香港人較為熟識嘅，就只有宋慧喬、車太賢同埋柳時元。不過喬妹嗰日打扮得真係好求其吓，乜嘢貴氣同豔光都冇晒，或者佢係唔想搶主人家鏡頭啦，不過我呢個《藍色生死戀》fans就好鬼失望囉！