全職示威鬥士古思堯雖然唔似梁錦松咁有米，不過佢同阿松有兩樣共通之處：一係兩個都娶咗位內地太太，二係兩位嘅太太都好靚女。
但講到同內地太太團聚，古思堯就唔似阿松咁輕鬆；內地太太大肚生仔，亦唔可以好似國寶伏明霞咁話留港就留港。最近古思堯呢位原籍河南嘅太太同兩歲兒子申請到雙程證來港，不過遇上沙士，阿古原本想叫太太唔好嚟，因為由香港返大陸時要被隔離十幾日好麻煩。
但鑑於雙程證批咗唔用，下次再申請就重麻煩，古思堯上周四終於帶埋老婆同個仔來港，九月先返大陸。好在前日香港旅遊警告撤咗，古太認真好腳頭。
噚晚古思堯擺咗四圍酒，宴請一眾民主戰友，介紹太太畀佢哋認識。古太咁靚女已經令眾人驚訝，古思堯個光頭囝囝重得意，十足爹哋咁儍得可愛，呢餐飯都算多嘢睇。
﹙圖﹚估唔到粗枝大葉嘅古思堯，竟然娶到一位咁溫柔斯文嘅太太，難怪佢望住太太同個仔時笑得咁開心。
傳真︰2623-9278
電郵︰