羅嘉良效力無綫十六年，七年前終坐正做無綫一哥，其間三度勇奪「我最喜愛男主角」獎，但現在這位首席小生有一哥唔做，寧在亂世下外闖做影壇初哥，原因只為求變及有家人在背後支持。就且看陶大宇及郭晉安，誰可繼嘉良之後，問鼎一哥寶座！ 撰文：朱芷瑩 攝影：陳偉權
羅嘉良加入無綫十六年，由路人甲乙丙開始捱起，由茄哩啡做到一哥。九七年，他憑劇集《難兄難弟》中飾李奇而首奪無綫「我最喜愛男主角」獎，翌年再憑《天地豪情》中演大頭文一角蟬聯，去年他又以《流金歲月》中的丁善本而將男主角獎項重奪手中。
在電視圈裏，七年內獲三次男主角大獎，既來得不易，也是一項紀錄，本來嘉良的一哥寶座坐得四平八穩，但近期他終於決定離巢外闖，捨棄了無綫這個人生中的第二個家，在紛亂的時勢下，轉投寰宇懷抱，進軍影壇。
嘉良早年曾闖影圈，與梁詠琪和曾志偉合作《失業皇帝》及《電影鴨》等片，嘉良日前在九龍城接受訪問時說：「前幾年都有人提議我出去闖吓，話魚唔過塘唔肥，但有啲嘢會係假象，過塘其實唔易，亦都需要鋪排，冇得心急嘅。人會長大，個人大咗就要求變，求變個個都想，要攞勇氣去變就唔容易，自己要衡量行呢一步啱唔啱，不過我從來都唔會後悔自己嘅任何決定。
「咁多年嚟，我不停拍電視劇，自己都希望可以做吓電視以外嘅嘢，最緊要係屋企人同朋友都支持我嘅決定，我已經覺得好足夠。」
穩坐一哥之位多年，有人嫌嘉良「阻住地球轉」，他走了，也許會造就更多小生上位，嘉良聞言即哈哈笑說：「如果有人要咁諗都冇法，𠵱家我咪走囉！講真，一哥呢個名係大家畀面啫，𠵱家有多啲人返嚟公司係好事，每一個階段都會有人上位，唔好講到我咁重要，TVB冇話冇邊個唔得，但公司真係畀咗好多機會我，我好多謝，但每個藝員亦都要努力做好自己，盡力把握機會至會有成績。」
對於「師奶殺手」陶大宇回巢再戰，郭晉安亦笑言想做一哥，問嘉良覺得誰能接棒？他說：「佢哋都好有經驗，個個都可以自己獨當一面。」但新紮小生中，嘉良就較為看好林峯，他說：「佢叻仔，同埋後生，後生已經係本錢。」
十六年的甜酸苦辣，令嘉良對無綫種下很深的情意結，他說：「個情意結係要幾深就有幾深，摸唔到底，以前拍劇好辛苦，但唔止羅嘉良辛苦，個個都辛苦㗎！唔開心嘅嘢，我唔會去記，我比較樂觀，人生滿希望，成日淨係諗住辛苦到死，想唔死都難啦！」
嘉良續說：「我喺無綫咁耐，一路都係死做爛做，我深信搏命工作，總有出頭天，好彩九六年嘅時候，我開始有機會，我一世人都會記得，九七年我第一次攞人生中嘅第一個獎，呢個片段太深刻。」
至於在這個時勢闖銀壇，嘉良會否覺得有點冒險？他說：「冇人知將來發生乜嘢事，我演戲咁多年，唔多唔少都有啲演戲基礎，但講到電影方面，我係初哥之中嘅初哥，𠵱家又有寰宇支持，我好信任新公司嘅安排，所以覺得好輕鬆。」
