郭富城噚日以護膚品牌Clarins代言人身份去銅鑼灣義賣,吸引咗二、三百人圍觀。城城一現身,場面即刻搞到好混亂,好彩大會派咗幾名保安喺現場維持秩序,城城先順利入到會場。
其實呢個由城城提出嘅義賣活動為期兩個禮拜,其中部份嘅善款會捐去《1:99音樂會》支持嘅茁壯行動,而城城嘅經理人小美噚日話:「之前有報道指劉天蘭話城城捐咗一筆天文數字畀茁壯行動,其實唔係,呢啲我哋唔會亂認,事實係Clarins捐啫。」但小美事後話城城會以自己名義嘅基金捐錢畀茁壯行動。
此外,城城對於香港終於解除旅遊警告大感開心,佢話呢兩日忙拍劇,又要綵排《1:99音樂會》,所以冇乜時間瞓覺,連合埋眼都諗住啲舞步。
鄭希怡(Yumiko)同王傑噚日去咗沙田出席法國婚紗晚裝滙演。代言人王傑同Yumiko出場時,見王傑面燶燶咁行咗個圈就算數,連帶Yumiko都好似畀佢拉番入去。今次Yumiko赤腳着婚紗行騷,佢話:「我覺得着婚紗唔一定要襯高跟鞋,唔着鞋或者着涼鞋都一樣可以好型。」
噚日有報道指有讀者投訴,台灣組合S.H.E日前喺台灣出席公開活動時所着嘅T恤,懷疑係日本裏原宿品牌APE嘅冒牌貨。事後S.H.E嘅經理人強調佢哋買T恤嗰時都唔知道係乜嘢品牌,只係見啲公仔得意先一人買一件,而且間舖話啲衫係喺日本帶返嚟,佢哋先唔擔心買冒牌貨。
安雅日前做咗聲帶手術,可以正常進食,但就唔可以講嘢。前晚衣着性感、戴住紅色假髮嘅安雅喺台北出席好朋友嘅酒吧開幕,見到朋友都傾唔到偈,要同朋友「筆談」。而安雅嘅前男友劉恆都有出現,安雅重好大方咁叫劉恆一齊影相,之後未到十二點,安雅就起身走人,話要返屋企休息。
尹光噚日去尖沙嘴出席一個敬老活動,同場重有張栢芝。尹光喺台上為老人家獻唱時,啱啱張栢芝到場,記者啲焦點就即刻放晒喺栢芝度,不過尹光仍然好專業喺台上唱歌,冇受影響。尹光表演完後重祝栢芝身體健康同埋影合照㖭。