世衞噚日突然送個大禮畀特區政府，宣布即時撤銷對香港及廣東嘅旅遊警告，八方嘅同事剛由日內瓦飛抵赤鱲角機場，就大鬧世衞做乜咁大整蠱，害到佢要趕返公司開工。
八方聽聞世衞整蠱得最大嘅，係以老董為首嘅特區政府，佢哋一直以為要到六月底先至滿足到世衞三大要求，點知祖國嘅「非典型副總理」吳儀一出馬，形勢急轉，所以話「弱國冇外交」，何況香港只係一個小小特區。
咁好嘅消息，董特首一樣慢幾拍。路透社下晝四點幾出稿，政府新聞處要二十五分鐘後先敢證實；老董話五點半見記者，結果成六點先出嚟，重好似急到裙拉褲甩，陣腳大亂咁。
其實股市已收到風，政府高層下晝兩點幾亦知會有好消息，剛好阿松都開緊振興經濟會，唔知係咪研究D-Day嗰日做乜；至於老董就直情等運到，如果唔係，點會咁匆忙，笑都唔識笑，份稿就肯定啱啱寫好未背熟。
而煲呔曾剛啱出席公益金便服日嘅千八萬善款支票遞交儀式，遇上世衞撤銷旅遊警告，佢即刻表現得喜氣洋洋，大讚醫護人員貢獻良多、港人團結。滙豐銀行連續十年成為公益金籌款最多機構，但渣打都唔弱，除咗成為籌款機構季軍，董事王冬勝重好開心咁同記者講，今日會舉行「渣打銀行員工購物日」，同二千個同事一齊去銅鑼灣時代廣場刺激本地消費。果然永遠快政府一步。
傳真︰2623-9278
電郵︰