世衞突然撤銷香港同廣東省旅遊警告，兩地力壓SARS疫情蔓延的努力，終於獲得肯定。港股噚日就好似有未卜先知能力，唔單止突破悶局，行情重大幅飆升，恒指衝破9300大關，高收9303，升172點，成交增至104億元。今次突破上次高位9217及3月高位9282阻力，且有大成交支持，中期升浪確認，短線目標10000關。
上升股（不計認股證）超過370隻，除基金繼續大力扯吸外，散戶亦開始活躍。中國電信（728）慢熱，但噚日都按捺不住，搶上1.64元高收，升5仙，成交更大增至1.45億股，大行買盤愈來愈急，好戲必在後頭。前日收到料話會有動作嘅中國糧油（506），噚日竟然同大市背馳，重下跌3個位，幾間大行連成一條戰線，由頭㩒到落尾，似乎注資消息收得太早，幕後重未做好準備工夫，看來中糧嘅後抽重會做多幾日，等機會上車可也。
近期市況轉旺，唔少上市公司都趁機會批股集資，亦有股東售股套現，不過，唔緊要，有人辭官，亦有人漏夜趕科場，就以毅力工業（332）為例，公司一名主要股東配售1.35億股（佔發行股數17.1%），作價1.95元，通告話承配人超過50名，但聽聞有絕大部份係落在強者手中，而在股市中，佢哋嘅活動能力比以前位主要股東更強。
億幾股唔係小數目，涉及2.6億元，但噚日毅力在低見2.05元後即高收2.15元，相信已食晒其他配散嘅貨，配股後股價能夠企得穩，已唔簡單，看來再定多3幾日就會再開車。
工業股呢一輪表現好強勢，毅力冇錯亦由低位1.7元升到上2.375元，不過，成年嚟計，同其他工業股相比，毅力重係大落後，股價由3.6元到噚日嘅2.15元，重唔見40%！期內，最威水嘅福田（420）同創科（669），升幅都超過1倍。
毅力有條件追落後，只要突破過去半年3次高位2.375元阻力，重見3字頭問題唔大，特別係今次配售，股票由「沉默股東」轉到「活力揸家」手上，毅力應可脫胎換骨了。04年度（3月年結），預測盈利2.8億元，每股盈利0.345元，PE只為6倍，息率有6厘。
郭兆誠