個市跌唔落，就借住隔晚美股好景而急彈，恒指升172點，收9303。槓桿率較大嘅藍籌Call輪，升到七彩。大市同唔少藍籌，可能短線超買，最好等回番少少之時始入市，另方面見啲Put輪散晒，亦唔適宜貪平買Put輪，因住月底期指結算，淡友再俾好友挾倉挾多一鋪。
世衞撤銷旅港警告，老實講，到港遊客數字唔會即時回復舊觀，但總有心理刺激，雖然作用唔會太大。國泰（293）、太古A（019）同中信泰富（267）等呢啲有Call輪發行嘅藍籌，應該有運行，又係心理刺激。相關Call輪如果唔係再大升，則仍然可以諗些少玩吓短線。
國泰Call輪得隻9810，隻輪明年4月到期，現價16.8仙，溢價11.2%，槓桿率5.7倍。中信Call輪6件，最啱落手嘅係9604，11月到期，現價10.8仙，溢價7.3%，槓桿率13倍。太ACall輪本來有兩件，但9475最終跌到冇得剩而夠鐘，剩番9660，隻輪明年1月夠鐘，現價33仙，溢價11.7%，槓桿率10.1倍。
近期有隻公司輪升得好厲害，就係路勁輪359，昨收6.4仙，單日彈升60%，同月頭2仙比較，升幅超過兩倍。路勁（1098）呢排陰陰吓上升，但亦唔應對隻輪有太大作用。隻輪9月到期，溢價24.3%，槓桿率63.7倍，作廢機會大。
章 盛