港股噚日勁升172點，收報9303，成交104.3億元，唔少期指大戶密密平淡倉，令阿虎覺得有景轟，收市後世衞宣布撤銷香港同廣東省旅遊警告，大戶收風果然係快。世衞撤香港旅遊警告比預期早，而且連廣東省嘅警告都一併撤埋，就真係令人更加意外，下周期指結算，睇嚟大戶會借勢挾多鋪。不過，阿虎戴咗咁耐口罩，戴落有感情，唔係好捨得除。
受惠最大的旅遊相關股份，重未反映撤旅遊警告的因素，中旅（308）微升0.9%；富豪酒店（078）無起跌；大酒店（045）算叻，升3.6%；國泰（293）升1.6%；東航（670）無起跌，南航（1055）僅升1%。雖則話旅遊酒店股要等一排至復甦，但股市反應永遠係行先，下個禮拜應該有得炒。
港股造好，連被主要股東大手配售減持的毅力（332）及嘉利國際（1050）都獲得支持，毅力收市無起跌，嘉利升逾2%。據聞上市公司近期因抽水抽得好過癮，將陸續有嚟，中意控股（1198）停牌，可能又係要配股，而裕元（551）旗下嘅新灃（1223）炒高10%後，又傳出正部署配股，配股價據聞係2.70元，較收市價3.30元折讓18.2%。
聯想（992）將於下周公布業績，噚日股價炒高5.8%，收2.275元。黑客話，有大買盤炒佢業績靚。中油（135）傳出搞私有化，股價一度勁升15%，但其後管理層話無聽過，股價回軟，升幅收窄至6.34%。但要留意係管理層話無聽聞，但是否提出私有化，主動權則在佢阿媽手上。
阿 虎