澳門地方雖細，但景點多，拍戲取景，一絕。
先來劉華反町的《全職殺手》槍林彈雨，再來《賭城大亨II至尊無敵》的葡京風雲、《大三元》的浪漫教堂，還有王家衞《2046》的古舊大街……
睹物思人，醫肚的時候，你可記得一幕又一幕的電影情節？
《全職殺手》
「嗱嗱嗱，阿O一出教堂門口，匿埋喺簷篷頂嘅托爾就亂槍掃射，搞到阿O要搵呢條柱做掩護。」Yvonne一談《全職殺手》，附近食肆員工即時搭訕：「係呀係呀！劉華勁靚仔，嗰個叫乜鬼丁（反町隆史）嘅日本仔紮條辮，好型啫！」型人靚景，確令人食慾大振。
地址：路環計單奴街
老遠到路環，只為一客馳名桑拿蝦，老闆很風趣：「蝦就要焗桑拿，人就唔使。」建議棄冷氣位，改坐樹蔭底的露天雅座，就算關上頭頂的吊扇，只以天然風納涼，一樣清風送爽，尋吃，最重要是吃得有風味。
店名：路環雅憇花園葡國餐廳
電話：(853)882086
地址：路環計單奴街8號
營業時間：上午11時半至凌晨1時
景靚，建在海邊的棚屋，遠眺可及大陸橫琴，偶爾還有白鷺飛過；人友善，老闆叫華記，司打碟一職：「Twins就搞唔掂嘞，一般大路歌我都OK嘅，歡迎搵我合唱喎，鄭伊健吖，我掂喎……」唱罷《一生愛你一個》，鵝公喉居然換來全場鼓掌，氣氛熱鬧得過份。
店名：華記美食
電話：(853)882197
地址：路環船人街29號
營業時間：晚上6時至凌晨1時
免費卡拉OK時間：晚上7時至11時
《2046》
還未上畫的《2046》，在澳門人稱的舊街取景，舊景正名河邊新街，一列的荒廢的唐樓，不論大閘石柱，配昏黃暗淡的街燈，確有六七十年代情懷。
地址：澳門河邊新街中段
老闆娘飛曼華，曾獲特區政府頒發《旅遊功績勳章》：「陳方安生、鄧小平個女、任達華、尹志強都嚟過海灣食嘢，最新鮮滾熱辣咪梁朝偉同王家衞囉，佢哋拍《2046》嗰陣，直情當呢度係飯堂。」
店名：海灣餐廳
電話：(853)967878
地址：澳門河邊新街216A號地下
營業時間：中午12時至下午3時，晚上6時至11時半。
《賭城大亨II至尊無敵》
多得燈光璀璨「葡京娛樂場」五隻大字，90年代的澳門黑幫仇殺江湖片，多取景葡京賭場，《賭城大亨II至尊無敵》是其一，劉德華加邱淑貞，就曾在葡京大門做對手戲，有印象否？
近葡京，輸光輸淨乖乖歸家，鍊贏何生就魚翅啷口，經理老陳見怪不怪：「想好景嗰陣，賭仔一贏錢就過嚟豪番餐，皆因呢度食翅最出名，天九、金山勾、頂群翅，要幾豪有幾豪，𠵱家時勢唔同，惟有推出平價鮑翅，價錢平咋，但一樣真材實料……」收到！
店名：福臨門
電話：(853)786622
地址：澳門新口岸友誼馬路259號地下
營業時間：星期一至五上午11時至晚上11時；星期六、日上午8時半至晚上11時。
《大三元》
在主教山賣紀念品20年的John哥說：「呢度嘅正確名稱應該係西洋望山聖母堂，好多戲都喺呢度拍啦，最出名係《大三元》，見明星都見到悶咯！」澳門人結婚，亦愛到此拍婚紗照，「反而睇吓啲新娘靚唔靚，重過癮。」
當人人自認是正宗豬扒包的時候，安記已想到用鴕鳥肉夾麵包；當所有茶餐廳只賣餐蛋腸腿麵的時候，安記已曉用墨魚汁煮意粉，還有甚麼檸檬利賓納、辣魚包，全是不墨守成規的自創起朵作，茶餐廳來說，委實不俗。
店名：西灣安記咖啡室
電話：(853)567385
地址：澳門西灣燒灰爐街順明大廈28號A地下
營業時間：上午7時半至晚上6時半