好戲連場，慢慢品嘗。
先來大話王黎明大三巴欺騙張栢芝，接着是山雞噴水池怒殺丁瑤，還有陳浩南細細粒湖邊漫步，埋尾再看十月初五的月光……
歎完戲，再歎美食，食飽至好上船走。
「三巴」是葡文「聖保祿」的意思，聖保祿教堂建於1602年，一場大火，把教堂及其附屬學院燒毀，僅存前壁及部份地基，因前壁似中國式牌坊，故有「大三巴牌坊」之名，黎明與張栢芝，就曾在牌坊底下的長石級談情說愛。
26年御廚經驗，曾服侍過七屆澳督的盧子成懷緬過去，說得淡然：「有苦有甜啦，甜咪人工唔錯，苦咪要受氣囉。」數最惡澳督非高斯達莫屬：「佢大食，一人食三份，要求三個『夠』，食物要夠熱、夠快、夠好味，佢試過衝入廚房鬧我煮得慢，等唔夠5分鐘發脾氣走人，我就慘嘞，佢唔食飯搞到我無得收工。」澳門回歸日退休，入主九如坊，出名御菜街知巷聞。
店名：九如坊
電話：(853)331818
地址：澳門板樟巷3號地下
營業時間：中午12時至晚上11時
浩南哥與細細粒，夕陽下，一幕湖邊拖狗散步，好溫馨，說的是南環人工湖；夜臨，卻鬼影幢幢，因澳門第一凶宅亦在湖邊，Yvonne說「十一支柱」的故事：「話說湖裏有一蠄蟝石，對正呢間荒屋，殺氣太大，屋主係有錢佬，家人相繼死去，惟有搵法師睇風水，得出結論係蠄蟝石作怪，所以喺前門起十一支柱擋煞，結果──都唔掂囉，最後死淨個老婆都癲埋，間屋以後都無人住啦。」
地址：澳門民國大馬路
問經理Eric利記有何特色之處，答：「食環境，因為對正人工湖，大時大節好似端午節扒龍舟、過年放煙花咁，靠窗位一定老早訂滿，就算平日夜晚嚟，都可以睇到旅遊塔，靚到痹呀。」
店名：利安餐廳
電話：(853)301189
地址：澳門民國大馬路14號1樓
營業時間：上午11時至下午3時；晚上6時至11時。
十月初五街只佔此戲些少片段，大部份的取景點，其實是米糙巷附近的建築物，這裏有連鎖店、雜貨舖、米舖、茶餐廳，由朝旺到晚，有時間不妨逛逛。
地址：澳門中區米糙巷
Yvonne瞓身推介牛腰撈及牛心撈（各$9）：「呢檔嘢我食咗好耐嘞，問老闆娘點解咁好味，佢話我煩，淨係答：『新鮮咪好味囉！』」（254C檔）
$15，有齊牛軟骨、牛腩、牛肺、金錢肚、牛雙連、牛天梯，好味一在那滾足45年的牛腩汁，二在老闆娘小阮的自製芥辣：「請有心理準備，芥辣係辣到標眼淚嗰隻。」（255C檔）
勝哥賣奶茶咖啡43年，以前在街邊擺檔，綜合大樓建成，食客不離不棄，為的是一杯瓦煲咖啡：「太多熟客嘞！唔飲過我沖嘅咖啡唔安樂。」瓦煲特點是令咖啡受熱度均勻，咖啡自然又滑又香（$5）。（251C檔）