1.同心為香港
大學生Flora同做汽車雜誌嘅Gary唔好賭馬，但一知道馬會響應同心為香港行動，響今季僅剩落嚟嘅幾日賽馬日，同本地旅行社合辦一日遊，響賽事前夕開放馬會禁地，提供有景自助餐……，都禁不住心癢癢要參加……
2.千米起步點禁地
馬會最短嘅一千米賽事就係響呢度起步！因為馬仔去晒預備，大家見唔到馬仔！亦唔可以踩上起步點草地！但係呢個響沙圈以外、平時只可以響電視見到嘅起步點絕對難得一見，梗要影相留個紀念！
3.40呎長運馬車有段古
又名大馬廂嘅運馬車點解咁長？皆因佢分成三個「單位」，每個單位都由一個馬伕眼仔對眼仔吼住一至三隻馬，防止佢暈車浪，及以便作出照顧！馬會運輸部職員會生鬼哋講解馬仔習性，一一解開大馬廂時速四十公里，以及馬仔打腳包之迷，重會示範點樣將一間單位變做三間，認真盞鬼。
4.去馬伕宿舍拜伯樂先師
警察就拜關公，跑馬就拜伯樂；百樂先師古廟位於馬伕宿舍，平時不時有馬會中人響處上香，保佑平安。
5.七彩馬陪你感受浪漫氣氛
話就話平時都可以去彭福公園，但係每逢賽馬日暫停開放嘅公園𠵱家會特地招待遊客，你可在藍天綠草噴水池邊Relax一下，同十六隻唔同Look嘅馬仔雕塑影相。
6.馬場全景伴中式自助餐
沙田馬場百勝廳可以睇到綠油油馬場全景，重可以感受到馬仔衝線前馬迷熱烈氣氛，食物又有質素，所以一直收費有番咁上下，一個人平均都要近二百蚊落樓！都話跟團抵，隨團享用中式自助餐有十八款食物任揀，羊肋排，肉鬆羹，雜錦豆甜湯係心水推薦！
限制：年滿18歲人士
收費：$238一位，另加$20服務費及$8旅遊保險費，送騎師公仔一個
主辦日期：由現在至6月14日沙田賽馬日
主辦：關鍵旅行社
查詢：28082613
記者：李玉蘭
攝影：陳盛臣
ImagePeople：Flora、GaryfromImagineLtd.