澳門「賭」字起家！廿一點、百家樂、牌九、角子老虎機……就算平日唔多賭錢嘅人，過到大海都例必到「沙圈」逛一逛，甚至玩兩手！由於呢度嘅不夜天特性，加上豪客聚集，基本上全澳門最靚嘅餐廳，都會向住呢啲賭場地段靠攏；由頂級鮑參翅肚、日式壽司刺身，以至幾百蚊一盅嘅正宗金錢龜苓膏，你都可以喺度食到，今日就教大家賭場「搵食」攻略！
澳門開賭已超過150年歷史，而且係世界三大賭城之一，有東方蒙地卡羅美譽；如果閣下係老賭徒，都應該聽過回力球呢種小賭玩意，不過在七八十年代，由於財政赤字愈積愈高關係，在86年公司重組以後，就改為回力賭場，所以就再冇得玩喇！對正新口岸回力賭場樓上嘅回力軒，係全澳門最大酒樓之一，由於同賭場完全零距離，所以經常有贏咗錢嘅人上嚟豪一番！至於輸咗錢都會上嚟食啲又平又好嘅小菜，所以一向有賭仔飯堂稱譽！
嚟幫襯嘅客，例必點呢個濃湯雞煲翅（$680/例牌；$1,360/大），十多両排翅被鯊魚骨熬成嘅湯底一撞，翅味濃得不可開交，千零蚊食到一梳梳翅，勁抵！好多贏錢客都話食佢勁「老嚟」，食完再賭包有斬獲！
Kenny：每次落回力前，都會上嚟食個翅，真係幾老嚟㗎，每次都有斬獲！
回力軒粵菜酒家
電話：(853)725555
地址：新口岸回力球場二字樓
營業時間：上午8時至晚上11時
金漢嘅滷水鵝片，喺澳門相當出名；好味出色全靠佢嗰桶10幾年嘅陳年滷水，除咗八角、桂皮、川椒同甘草之外，精華所在都係十多年裏面，混雜咗成千上萬隻嘅鮮鵝肉汁，第二度包你食唔到！
鵝片皮部份唔油，而且肉身非常入味，最正係滷水味恰到好處，入味得嚟唔會蓋過鮮鵝肉香。
金漢潮州酒家
電話：(853)725577
地址：新口岸新八佰伴購物中心三字樓
營業時間：星期一至六上午11時至晚上11時；周日及公眾假期前夕上午10時至晚上11時。
葡京可以話執全澳賭場之牛耳，而裏面嘅江戶日本料理，亦都可以話係全濠江至正宗、最靚料日本料理；總廚譚社光係澳門第一代本土日本料理師傅，已經有20多年日廚經驗，不論和食、壽司及鐵板燒，都跟正日本師傅學藝，所以好多澳門本土人都話，想食至正宗日本料理，真係只會去江戶！
響螺刺身都係葡京賭仔贏錢必食菜，最正係用正北海道響螺，味道濃而肉質爽口，再在餸面放上一啲金箔，寓意大家去賭錢時有金執！另加$140可多食一味響螺炒黑菇辣椒仔，用鐵板式煮法，好有鑊氣！
譚社光總廚，自77年開始跟日本師傅學藝，係全澳第一代日食料理師傅。
江戶日本料理
電話：(853)713888
地址：葡京酒店舊翼地下
營業時間：上午11時至凌晨4時
金庸提筆親書，「澳門四五六 滬菜頭二三」，大家可知這裏的滬菜，絕對是數一數二！呢度嘅招牌菜式為松鼠黃花魚，大廚話香港附近水域並冇真正嘅黃花魚，所以改從上海每周空運抵澳，不過更難得是二十多年老師傅嘅刀章，將魚身細切成一粒粒但剛剛連骨，用筷子一夾即起，再蘸少少米醋醬汁，入口即化，純滬菜風味！
金庸在02年曾到此食飯，食後就留下了這句墨寶。
四五六上海酒菜館
電話：(853)388474
地址：葡京酒店新翼閣樓
營業時間：星期一至六上午11時至午夜12時；周日及公眾假期前夕上午10時至凌晨1時。
香港食到嘅龜苓膏，多數都係用俗稱龜板所熬製；不過葡京呢間龜盅補就好唔同，佢係用原隻梧州金錢龜，另加二十多種名貴藥材所製成，𠵱家金錢龜要作$7,000多元一斤，師傅話百幾蚊一盅龜苓膏，差唔多一半有多嘅價錢，都落咗去「龜料」之上，所以清熱解毒效能力特高，落完賭場通宵搏殺，食一盅包「燥熱」全消。
龜盅補
電話：(853)713838
地址：葡京酒店舊翼地下
營業時間：二十四小時營業
白鴿票都係澳門一個特有賭博遊戲，玩法有少少似歐美等地流行的Bingo，所以玩者成日都要留意住個跳字牌；好在呢度都一樣搵到好嘢食，呢度嘅麫全部自製，本土人話最正都係蝦子麫，皆因蝦子用料係用正一級上等蝦子，澳門本土都唔係太多地方食到！另外，呢度嘅雲吞都好正，用厚肉中蝦加鮮豬肉，湯底就好重大地魚味，製作認真唔係講笑！
麫底特別正，蝦子味夠重，麵身夠彈牙，喺澳門嚟講，佢嘅麵食都算數一數二。
百福麵家
電話：(853)712288
地址：南灣殷皇子馬路四十一號（白鴿票側）
營業時間：上午9時至凌晨4時