奧拉利有幸當上維拉領隊後，已經表明會以帶領球隊取得參加歐洲賽事為目標，並準備引入新球員增強實力。不過，維拉會長艾利斯表態，叫奧拉利放棄爭保耶。
保耶早前俾韋斯咸列入出售球員名單中，曾經喺列斯教過保耶嘅奧拉利，就想爭贏紐卡素，力邀呢位中場過檔；點知艾利斯講明呢次交易唔會成事，理由係無咁多錢搵貴價球員。而紐卡素最終亦同保耶簽咗四年合約。以維拉現時境況，真係支付唔起簽一啲貴價球星，奧拉利擴軍方面應該遇到唔少阻滯。
依我求大俠所見，其實維拉陣中已經有唔少球員，一批英格蘭球員包括華素爾、杜布連、巴利質素唔差，外援好手都唔少，有足夠兵源畀奧拉利執番正隊波，可以唔使咁快搵新兵住喎！
南韓、日本分別公布下周六友賽球員名單，日本教頭薛高堅持畀中村俊輔等四名海外球員休戰，反而南韓決定強陣出擊，朴智星同車斗利等歐洲兵全數入選，睇嚟想報卻上月友賽一敗之辱。我求大俠都有睇嗰場友賽，南韓完場前輸波的確唔抵，相信今次碰頭又會擦出火花。
摩納哥日前作客輸畀甘岡，冇咗個錦標，而教練迪甘斯啖氣仍未消，指阿根廷中場加拿度屢失良機，累球隊輸波；結果加拿度就公開反駁，指迪甘斯根本唔識教波，重話季尾離隊，最終不歡而散。咁嘅士氣，睇嚟摩納哥禮拜日想主場贏特魯瓦「煞科」都幾難！
中國甲B聯賽暫停，加斯居尼早就已經去美國避炎，亦有傳言話去睇心理醫生；而佢日前返英國時，喺機場畀傳媒見到，發現佢剃晒眼眉毛，又穿耳環戴頸鏈，形象與同性戀歌手一樣。我求大俠見到加斯居尼呢個新形象真係不敢恭維，怕且呢位前英格蘭名將心理真係……
卡迪夫千禧球場將一連三日有三場英格蘭不同級別升班附加賽進行，但係咁密賽程，球場肯定變爛地。其實，禮拜日有一場由昆士柏流浪對卡迪夫城嘅乙組升班附加賽，就連梳打埠都罕有地打算為呢場乙組波開盤，想知本報貼士，留意聽日體育版啦。
佩魯賈主席加奧斯一直為球會引入新元素，以前就率先羅致中田英壽同安貞煥，而佢最近又有新構思，想羅致利比亞狂人之子成為隊中一分子，如果成事肯定可以提高球會喺非洲嘅知名度。我求大俠知道卡達菲喺意甲有一定影響力，擁有祖雲達斯同拉素部份股份，如果小卡達菲真係加盟佩魯賈，都算係意甲球壇的傳奇人物。