英國男士雜誌《FHM》啱啱喺噚日公布咗「2003年全球最性感女士選舉」結果，黑人金像影后荷爾芭莉（HalleBerry）力壓一眾後生靚女成為冠軍，而且現年三十四歲嘅荷爾，亦都係《FHM》有史以嚟最老嘅No.1，勁！
今次選舉全球有超過五百萬人投票，極具代表性，除咗一身比堅尼邦女郎look令好多男士流晒口水嘅荷爾攞獎之外，澳洲女歌手HollyValance今次亦榮登第二位，緊隨其後嘅就係收埋咗自己好耐嘅小天后BritneySpears。
不過Britney前日喺紐約出席一個拍賣自己舊衫嘅宣傳活動時鬼咁風騷，唔通佢知道自己一定榜上有名？而上年都能夠打入十大嘅澳洲性感女歌手KylieMinogue，今年都可以排第九，雖然佢呢兩日喺英國IvorNovello創作人大獎空手而回，不過𠵱家能夠入選全球最性感女士之一，總算有所交代。
另外，前日美國VH1電視台搞咗個「DivasDuets」嘅節目，極度風騷嘅BeyonceKnowles咁鬼搶鏡，難怪佢都可以躋身最性感女士選舉第十五位。查實乜嘢叫性感我羅拉真係覺得好抽象，不過點都唔會好似OzzyOsbourne嘅老婆Sharon咁，特登拉低衫畀人睇個胸嗰種囉！