陳冠希（Edison）同余文樂年初喺《勁歌》頒獎禮嘅撞膊事件，有傳話Edison同阿樂為爭鍾欣桐（阿嬌）所以反面，但實情係Edison同阿嬌分手之後，阿嬌至同阿樂一齊。但見舊愛阿嬌轉投第二個男人嘅懷抱，Edison當然冇癮啦。
雖然呢兩年嚟Edison都同陳文媛（BoBo）拍緊拖，但Edison一腳踏兩船，同時愛上阿嬌。原來阿嬌一直都好迷戀Edison，有次Edison錄音，阿嬌一等就等咗佢四、五個鐘頭，毫無怨言，但Edison並冇因為阿嬌而放棄同BoBo嘅感情，所以阿嬌同佢拍咗半年拖後，終於頂唔順分咗手，之後阿嬌就同咗阿樂一齊。
Edison咁靚仔，當然有好多女仔鍾意，其實佢對女仔好溫柔體貼，睇佢對BoBo就知啦，除咗成日買嘢𠱁佢開心之外，BoBo鍾意嘅嘢，佢亦一定唔會托手踭，睇BoBo成日周身名牌，就知Edison為佢使咗唔少錢啦！
錢嘉樂、保采芬、黃伊汶同吳家樂，噚日去尖沙嘴出席無綫《車迷動感世界》記者會。
錢嘉樂噚日遲到咗半個鐘頭，當佢見到黃伊汶時，竟然唔准佢企起身，佢話：「以前做龍虎舞獅習慣『寒背』，𠵱家就要成日挺胸。同黃伊汶合作，我都警告佢唔可以着高踭鞋。」
而黃伊汶並冇車牌，佢話：「我以前喺加拿大考車牌，肥咗三次佬㖭！」
中國籃球明星姚明係百事代言人，但近日有人發現內地可口可樂罐印咗佢嘅肖像，於是代表姚明嘅「姚之隊」律師噚日正式向法院提出訴訟。
姚明同百事噚日分別發出公開信，百事嘅聲明上重申呢件係姚明與可口可樂嘅法律糾紛，而百事就會全力支持姚明，唔會因為呢件事影響合作計劃。
鄭中基已經三年冇出碟，所以佢今次出碟就好緊張，重成日失眠。中基噚日去港台做訪問，佢話：「我已經打畀學友同區丁玉問意見，至於千嬅，我會下個禮拜先打畀佢。」
鄭中基重答應咗千嬅寫歌畀佢，佢話：「我唔會寫情歌畀佢，因為佢好鍾意堡壘、王子，所以我諗住寫啲抽象歌畀佢唱。」
劉嘉玲近日不停為《無間道II》開工，佢前晚同陳冠希喺啟德舊機場附近拍外景，有記者同工作人員發生碰撞，記者報警求助，陳姓電影公司職員以五百蚊保釋。當時導演劉偉強為爭取時間，冇理會紛爭，照拍一場撞車戲，個車手竟然炒車撞埋劉偉強度，好彩工作人員即時推開劉偉強，唔係就大件事！
