陳松伶日前應「同心為香港」活動到日本旅遊，前晚返港。瘋狂掃貨和吃喝玩樂，令松松將沙士困擾拋諸腦後，她表示此行除了遇上香港旅行團團友，令她大為興奮外，更發掘不少潮流購物點。
記者戴彩煥東京直擊
獲國泰航空公司及東瀛遊贊助前往日本參與「同心為香港」活動的陳松伶，前晚已返回香港，雖然今次只是短短四日行程，但卻足令松松大豐收，種種新奇玩意令她眼界大開，將沙士困擾一一拋諸腦後。
松松說：「雖然日本方面對非典型肺炎問題好重視，電視新聞日日都有報道最新消息，但整體嚟講，日本人冇因為沙士問題而抗拒香港人，好似有一日，日本電視台做咗個調查訪問，二十個日本人中，二十個都冇因為怕沙士而戴口罩，藥房嘅口罩亦冇話好賣啲。而我喺日本四日以嚟都冇戴過口罩。」
留日期間，松松遇上香港旅行團的團友，大有他鄉遇故知的感覺，松松昨日在電話中感慨地說：「以前去親日本一定會撞見好多旅行團，但今次明顯少咗好多，不過，今日啱啱聽到香港獲得撤銷旅遊警告，感覺真係好開心、好興奮，相信不久將來香港各行各業都可以回復昔日咁興旺。」
而松松今次亦曾到本月一日才開業的後樂園新遊園地Laqua遊玩，又到涉谷的北海道著名拉麵店大快朵頤，更發掘到一個購買潮流T恤的地點，松松說：「日本著名藝術家奈良美智，以及同LV玩crossover嘅村上隆，佢哋嘅圖案tee喺香港買要五百至七百蚊一件，但喺表參道附近嘅Nadiff書店度，只係賣二百幾蚊一件，結果我咪搞到大出血囉。」
