小初記得上周五寫過泓鋒國際（2309），經紀陳話隻股上市剛好夠6個月，傳聞想配股。小初當時認為高追有風險，但估唔到隻股升勢持續，噚日再勁升18.34%，收2元。
雖然小初被經紀陳話無膽笑到面黃，但仍然維持原判，都係認為高追風險大，就算公司將來嘅業績唔錯都係咁話。
不過經紀陳就唔係咁睇，重推介另一隻情況類似嘅二三線股畀小初，就係遲過泓鋒上市嘅滙多利（607）。滙多利去年12月中上市，以每股0.80元招股，上市後股價一直潛水，據聞成班人坐到一手貨，無法散得出。原來下個月又夠上市6個月，大股東可以沽貨，公司又可以批股集資，股價近日明顯異動，似乎想開車。
工業股呢排個勢好，滙多利噚日借勢炒上，勁升14.47%，收0.87元，終於高過招股價。小初深知呢類股份風險有幾高，所以最多都係玩吓一夜情。