《記者陳志嵐惠州直擊》彭丹、顏仟汶、邱月清、楊嘉雯同內地演員張美童及李敏等，前日喺早前遭SARS肆虐嘅廣東省，為內地投資電影《各為其主》同《完美天使》開鏡。
彭丹之前喺一套內地電影、故事講述張國榮一生嘅《風繼續吹》中扮演梅艷芳，對於阿梅表示希望各方唔好用投機眼光去拍，彭丹話：「我只係一個演員，好多嘢唔到我控制，係投資者嘅決定，不過戲裏面全部都係講哥哥嘅好嘢。」
另外，顏仟汶對於被影到同男友同居一事，佢話：「我都唔知俾人跟咗三日，當我發現有記者嘅時候，本來想叫佢哋唔好走，等我換件tube-top畀佢哋影，點知就愈叫愈走，其實我同男友都同居咗一段時間。」自非典型肺炎疫情好轉，前日顏仟汶首次返內地，佢話：「呢幾個月都唔敢返嚟，取消咗好多登台，都有成六位數字。」
梁家輝噚日接受新城電台訪問，對於有傳佢有份演出《無間道II》，但嫌戲份少過黃秋生所以辭演，家輝講笑話：「我同劉偉強好熟，係有傾過個劇本，但真係冇搵過我拍，惟有望佢哋開第四集，但人哋講過唔開第四集。」講到張國忠前日遇襲，家輝話：「我冇打畀佢，但知道有朋友已經搵到佢，相信只係小事，只係咁不幸被人打劫。」
傳咗好耐張學友會隨老友鄭東漢由環球過檔EMI，不過之前馮仁昭都講過，學友會續約台灣環球，香港就隸屬上華唱片，終於馮仁昭噚日收到上華發出嘅請柬，上華會喺下星期二幫學友喺洲際酒店搞個大型續約記者會，正式宣布學友續約。𠵱家咁嘅市道都肯畀錢搞大型記者會，相信只有學友咁嘅級數嘅歌手，先有咁好待遇。
陳曉東噚日去北京為新劇《倩女幽魂》主題曲做弦樂嘅配樂，要到下個禮拜先返香港，所以做唔到「1:99音樂會」，但佢不忘支持抗炎行動。原來東東之前同張達明幫一間電訊公司，錄咗段講抗炎同埋打氣嘅聲帶，畀人放喺手機度播，東東重會將錄聲帶嘅酬勞捐畀「茁壯行動」，佢話幫得幾多得幾多喎。
陳慧琳（Kelly）後日會代表公益金，到銅鑼灣出席「一人一歡笑慈善大行動」接受約三十萬嘅善款。而早排佢亦提供一張自覺笑得最燦爛嘅照片，支持呢個行動。Kelly噚日喺電話度話：「我覺得每個人都應該笑多啲，咁樣可以令身邊嘅人開懷，抵抗力都會強啲。」
