港股在9200阻力大，資金轉炒中資股，中移動（941）升逾2%，中海油（883）升逾4%，帶動港股上升71點，收報9131，成交79億元。
中資股熱炒，連巨型嘅中石化（386）及中石油（857）都升約4-5%，加上國內電力股亦被掃高，阿虎問黑客，係咪真係有中資熱錢流入？黑客話，佢唔太清楚，但就知道之前炒開藍籌的資金輪流炒作，大戶見到恒指欠缺動力，轉炒中資股，而且有唔少散戶跟炒，所以大戶繼續炒多陣。
噚日又有兩間公司大股東骨水套現共4億元，其中傳聞毅力工業（332）大股東配售1.58億股，每股作價介乎1.92至1.95元，抽水逾3億元；嘉利國際（1050）大股東又以每1.80元配售6000萬股舊股，抽水1.08億元。Cookie話，高追嘉利要小心，此股由1.61元炒高至1.91元配售，唔知今次配完之後會唔會大散。毅力亦有炒高配售之嫌，不過唔少投資者已聞風先遁，股價噚日大跌8.5%，收報2.15元。不過，公司則表示基金對工業股有需求，大股東才進行配售。
太平地氈（146）話大股東有意提出私有化，但無講收購價就已經復牌買賣，急升76%，收報1.55元。ｉ師傅話，太平地氈每股資產值約3元，市傳私有化作價大約是每股資產淨值的50%，換言之私有化作價約為每股1.50元。如果屬實，即係太平地氈已經到晒價，再無炒作餘地。
最近市場高調進行私有化行動，根據傳統智慧，呢種情況係反映好多股份，股價較資產值有大幅折讓，唔少港股都係物超所值，連創業板股上藥（8018）都話要私有化，私有化之風亦吹到創業板。
阿虎