東涌海堤灣畔噚日個記者會可謂別開生面，發展商同代理搞咗場竹戰，啪啪聲，氣氛十足去飲，事關中原贏咗早排搞嘅銷售大獎，噚日獲發展商頒贈三十萬元獎金，又隆重其事訂咗個大蛋糕（圖二）。中記為回饋買家，預備88副麻雀送畀周末睇樓客。發展商恒基張炳強同新世界何伍燕榆，係出晒名嘅雀林高手，噚日就忍唔住露兩手，同中原黃偉雄及陳永傑湊夠一枱，打咗場慈善賽，胡一鋪就位位二百。結果打咗兩鋪，張炳強同黃偉雄各贏一鋪，皆大歡喜。
兩間發展商合作嘅元朗綠庭園，早前發生代理衝突，噚日舉行嘅慶功宴，就特別點咗三味齋菜，希望化解大家嘅戾氣咁話，分別有南乳溫公粗齋、花菇燉竹笙湯及鼎湖如意上素，幾款菜式味道唔錯，最緊要係氣氛和諧。
搞完抗炎行動，𠵱家社會各界開始鼓勵消費，持有多個商場收租嘅地產商當然更加落力，好似信和咁，近排花成千萬元，搞咗個「信和商戶心連心超級連環大獎賞」，市民消費可以抽獎攞美食現金券或者超市購物券，最大碼就係二十萬信用卡免簽帳額，消費完去抽獎，攞獎後再消費，總之呢個算盤點樣敲都一定響啦。
豪宅新盤又出籠，由中國國際信託投資嘅南區南源示範單位差唔多竣工，中信企業總經理關潔瑩話，6月就可以畀貴賓參觀。
示範屋係67號屋，面積四千八百幾呎，請咗SimonJackson負責室內設計，成間屋整咗五百萬。
Simon話香港地咁大間屋好少見，室內設計一定要配合埋出面個自然環境。佢重親自四出搜羅各式家具，連噚日記者會坐嘅櫈，都係喺示範屋搬嚟。Simon兄來頭唔小，幫過好多大發展商設計示範單位，唔少名人如李澤楷、包陪麗等都係佢嘅客仔。
各界向醫護人員致敬行動天天新款，其實都係一番心意，遲早唔係問題。好似美聯就設計咗三張心意卡，表達對醫護人員慰問，今個星期會收集所有員工簽名嘅心意卡，送去醫院。黃老闆就率先簽咗一張做樣本，重語重心長咁講，非常感謝醫護人員不辭勞辛，堅守崗位，又希望所有病患者早日康復。
以「年輕人的家」作包裝宣傳嘅元朗大盤YOHOTown，銷售對象非常鮮明。一向注重住客服務嘅新地，安排「YOHO小廚」同埋「YOHO好姐」服務。
住戶只須喺網上或電話預訂，就可以用五十幾蚊嘅價錢，享用兩餸一湯嘅健康菜式。餐單重由著名創作人兼專欄作家歐陽應霽撰寫。另外，由十多人組成嘅「好姐」隊伍，就照顧住戶嘅家居需要。住客如果需要衣服洗熨、家居清潔、維修等服務，只要致電或email「好姐」就掂，服務每個鐘五十幾蚊。
噚日新地周國賢好落力推介啲新服務，重話呢個驚世大盤，具備天時、地利同人和，好有信心一定勝利。
蘭西噚日同物業顧問行萊坊國際午宴，問到沙士對本港物業市道嘅影響，該公司香港區行政總裁韋理信話，仍要較長時間觀察。呢個答案，蘭西當然唔收貨，追問之下，佢估計寫字樓售價全年會跌一成七，租金則跌一成至一成五，價位全線向下，部份用家會趁機改善環境，可望增加交投量，重預期04年會好轉㖭！佢咁樂觀，因為有實例喎，換馬嘅就係萊坊國際自己，𠵱家分別喺北角同中環有寫字樓，7月就會遷往灣仔會展，面積不變，同係九千呎，但月租就平咗一半。
蘭西
電郵地址：
