胡杏兒有兩個姊姊,她表示當年因為時興「兩個夠晒數」,對於她,兩位胞姊似乎不太歡迎。杏兒記得有一次跟二家姐爭坐沙發時,二人竟大打出手,結果二家姐一腳踢中杏兒粉頸,她為了嚇其姊,不惜作狀扮窒息,杏兒的大家姐差點要致電報警求助。
胡杏兒自小胖嘟嘟,人見人愛,只是隨着成長,她的babyfat漸漸開始褪減,杏兒日前翻看自己的童年舊照,她都忍俊不禁。
杏兒一共有三姊妹,她自幼在一個小康之家長大。杏兒小時候精靈活潑,她記得七歲那年,跟比她年長兩歲的二家姐在家中爭坐沙發時,兩姊妹忽然打起架來,杏兒的二家姐為了把妹妹趕離沙發,她竟一腳伸向杏兒的粉頸,杏兒明知自己力量不及姊姊,她即時想鬼主意,杏兒說:「我即時扮到好辛苦,又作狀扮窒息,嚇到我大家姐好驚,佢話怕我真係會死,重即刻去打電話叫白車,我聽到佢話要打九九九時,梗係好驚,於是立即起番身,但二家姐全程都好淡定,因為佢話一早知我係扮嘢。」
問到杏兒自幼三姊妹感情是否很好,她說:「其實我覺得兩個家姐,自細係唔鍾意我,當年政府成日宣傳『兩個夠晒數』,家姐知道我出世,就覺得我呢個細妹會分薄咗佢哋嘅零用錢、玩具同靚衫,所以佢哋唔太鍾意同我玩。」幸好隨着成長過程,杏兒的兩位姊姊都愈來愈喜歡她,三姊妹的感情有增無減。
杏兒表示自幼雖得父母歡心,但亦試過給爸爸藤條炆豬肉,杏兒說:「我三歲時出水痘,因為唔肯飲苦茶,所以爸爸就用藤條來威嚇我,結果我都係飲一半嘔一半。」而在她十二歲時,家人便把她送到北愛爾蘭念書,目的是想讓她學好英文。
採訪:比華利