馬主K隻馬前年來港，第一季表現平平，成績甚曳。今季開始前就拉倉，聽倉主大少話，閹咗隻馬，休息後重新部署，倉主大少對馬主K拍晒心口：「夠膽講，你隻馬有質，今季可以贏三場！」馬主K聽咗，開心到極，點知隻馬在季初沙田馬場次次跑第四第五，次次後上不及。馬主K輸錢事小（其實唔多賭錢），面子事大，冇理由俾啲親友夥計下屬喺背後笑到面黃嘅啫。
倉主大少亦幾乎輸到服，心生一計，諗住沙田唔掂，不如去跑馬地跑一六五○米，一試之下，竟然厲害，三戰三捷，贏到冇人信，亦達成倉主大少嘅季初承諾，馬主K大喜之餘，於是請倉主大少到Nieholini食午飯，馬主N與左丁山亦到場湊腳，大講馬經，亦順帶恭喜倉主大少下季正式升做練馬師大展鴻圖。
倉主大少升職，皆因簡炳墀退休，卓普咸唔撈，多咗空缺之故。卓普咸鬆人，是意料中事，食力簡退休後嘅動向，就惹人注目。有傳聞話食力簡去澳門開倉，但從佢嘅朋友馬主C嗰邊聽到，食力簡其實好鍾意留港工作，為馬會服務。點講佢都係土生土長嘅幾屆冠軍練馬師，馬會禮聘佢做顧問也好，做甚麼經理總監都好，簡蛇點都會繼續發光發熱嘅。馬場其實需要一啲草根英雄，製造神話，咁至可以吸引馬迷嘅長期興趣，簡蛇就係神話製造者，馬會唔好「放過佢」！