「負資產問題」唔止困擾港人，連歐洲大球會都遇上呢個煩惱。好似阿仙奴咁，當年以破紀錄轉會費簽入韋托特，但𠵱家人哋唔肯續約，呢個時勢又唔易將佢「好價」賣走，根本就係負資產！
除咗阿仙奴之外，富咸都要為減負擔，迫得要將兩年前以近千二萬鎊買入嘅馬列，降價到八十萬鎊求售，重要係「急讓」嗰隻，隨時重有價講㖭！你話唔啱價咪唔好賣住，等經濟環境好啲先；但係球員唔同股票，球員有合約期，約滿之後拍拍籮柚走人，到時就真係見財化水囉！
阿仙奴同埋富咸都叫做好啲，起碼一隊係爭標分子，一隊就有個有錢老細阿法耶茲；修咸頓重慘，早年以七百五十萬鎊喺布力般簽入嘅前鋒戴維斯，一直冇表現，球會都諗唔到咩理由同佢續約，「局住」畀佢免費走人㖭，唉！蝕到喊呀！
我求大俠前晚睇完場歐洲足協盃決賽大戰，就真係忍唔住要鬧下波圖個門將拜亞。想當年佢都算係歐洲鋼門之一，但係喺呢場決賽嘅表現就真係不敢恭維，高波出迎時間冇準，臨完場重要「詐傷」嘥時間，冇料又冇球品，累到霸主波圖被扣不少印象分喎！
國際米蘭後衞高高成季受傷同缺態，喺球場上冇咩佳作，不過佢經營有道，喺佢細個讀書嘅地方──米蘭西南部萊利亞諾其中一條街開咗三間店舖，同埋一間酒吧，聽講生意唔錯，有啲當地人甚至叫條街做CocoStreet（高高街），咪話唔威水。
咪話我求大俠成日針對厄瓜多爾球證摩蘭奴，停完賽二十場無耐嘅佢，禮拜日喺一場國內比賽趕咗三個球員離場惹爭議，於是又俾厄瓜多爾足總罰停吹一場。由佢喺世界盃執法南韓對意大利惹爭議、停賽以至上意大利電視台做諧星，夠晒傳奇，簡直可以當電影題材。
前日山度士對克魯斯阿蘇爾場南美自由盃，山度士「10號仔」迪亞高比賽中離門四十碼笠入對方龍門，技驚四座，有通訊社甚至起埋題讚佢，經此一役後相信佢名頭更響。睇嚟呢個着住當年球王比利件波衫嘅風頭躉，出國搵食之日不遠矣。
李鐵留愛華頓下周定案
據愛華頓發言人透露，李鐵會唔會成功轉會將會下周有定案。不過，「拖肥糖」預計只會得五百萬鎊作為羅致球員，其中賣斷尤保轉會費佔咗約三百五十萬鎊，所以遼寧方面為李鐵開價一百萬鎊應該唔通過。如果李鐵最終唔會以借用性質續多一年，相信轉會費會係五十萬鎊左右，就算佢係應屆亞洲足球先生候選人都咁話！