近期接二連三有二三線工業股的大股東減持舊股，噚日一口氣就有毅力（332）、嘉利國際（1050）及理文手袋（746）。小初唔係唔抵得人哋減持套現，但就覺得有小小唔舒服，搞到個個好似趕住落車，對香港似乎冇乜信心。
經紀黃唔同意小初嘅睇法，佢提醒小初好多批舊股情況，其實係好有承接力，反映芬佬繼續求貨，唔應該睇得太淡。佢又話，唔係隻隻工業股批股都會升，好似毅力咁，第2大股東批股，其實係個大芬減持，股價事先被質到傻，噚日跌8.5%，收2.15元，今日走勢亦唔樂觀。
經紀黃睇好超級冷門股理文手袋，隻股由阿媽理文集團分拆出嚟，然後理文集團就連殼都賣埋，大股東分拆賺咗一隻殼，跟住又甩埋隻舊殼，咁好嘅財技確令人觸目。
今次理文手袋大股東雖然減持舊股，但聽行家講，成手貨係由芬佬大手接晒，所以理論上唔應該有沽壓，因此可以留意。
慕容小初